Oqartussaaffeqarfinnut

ISO 27001-ip tamakkiisumik atuutilersinniarneqarnera pisinnaaqqullugu, qitiusumik aqutsisoqarfimmi pioreersumi  tunniusimasunik aqutsisoqarnissaq kisimi apeqqutaanngilaq. 
Paasissutissani isumannaallisaaneq oqartussaaffeqarfinni ataasiakkaani eqqarsaatigineqarnissaa aamma pisariaqarpoq, taakkunanilu paasissutissani isumannaallisaanerit assigiinngitsut, suleriaatsit nalorninartullu assigiinngitsut paasissutissani isumannaallisaanerit qaffasissusaanni assigiinngitsuni pisariaqartinneqarlutik. 

Cyberimi Paasissutissanilu isumannaallisaanermut immikkoortortaqarfimmi, nuna tamakkerlugu Digitalinngortitsinermut periusissiaq naapertorlugu, oqartussaaffeqarfiit ataasiakkaat nukittuujunissaat sulisutigullu pisariillisagaanissaat atuutilersinniarlugu, oqartussaaffeqarfiit ataasiakkaat pisariaqartitaat aallaavigalugit ikiussavaat. 

Matumani makku ilaatinneqarsinnaapput:

• Oqartussaaffeqarfinni ataasiakkaani sulisunut aqutsisunullu saqqummiinerit, workshoppertitsinerit, pikkorissaanerit, il. il.
• Nalorninartut nalilersornerisa suliarinissaannut siunnersuinerit, niuernikkut upalungaarsimanermut pilersaarutit il. il.
• Nalilersuinerit (Auditering)
• Paasissutissani isumannaallisaanerit suussusersiorneri pingaarnersiornerilu.

Arlaannik pisoqartoqarsimatillugu ulluinnarni nalinginnaasumik sulineq iluatsittumik ingerlanneqarsinnaanngikkallartillugu immikkoortortaqarfinni tamani upalungaarsimanermut pilersaaruteqarnissaq aalajangiisuulluinnartuuvoq. 

Taamaattumik oqartussaaffeqarfiit tamarmik upalungaarsimanermut pilersaarusiortariaqarput makkunannga:

• Niuerneq pillugu upalungaarsimanermut pilersaarut (Business Continuity Plan)
• Allaffiit pillugit upalungaarsimanermut pilersaarut (Brand- og evakueringsinstruks)
• Qarasaasiaqarneq pillugu upalungaarsimanermut pilersaarut (oqartussaaffeqarfik namminerisamik atortorissaaruteqaruni oqartussaaffeqarfimmi sulinerup naammassinissaanut pinngitsoorneqarsinnaanngitsutut nalilerneqarpata)

Cyberimi Paasissutissanilu isumannaallisaanermut immikkoortortaqarfik tamatumunnga atatillugu upalungaarsimanermut skabeloninik, Qarasaasiaqarnermut niuernermullu upalungaarsimanermut pilersaarutinik, kiisalu ikuallattoqartillugu sungiusaatinik suliaqarnissamut ikiuisinnaavoq.

Nunani tamalaani paasissutissani isumannaallisaanermut malittarisassaq ISO 27001/2-p Naalakkersuisuni taakkulu oqartussaaffeqarfiini atuutilersinneqarnissaa Digitalinngortitsinermut Aqutsisoqarfimmit pingaarnertut akisussaaffigineqarpoq. 

Tamatuma malitsigisaanik:

• Politikkit najoqqutassallu suliarineqarlutillu atuutsinneqassapput
• Nalorninartunik naliliinerit suliarineri ingerlateqqinnerilu aamma nalorninartut nalilersornissaannut workshoppertitsineq, ilaatigut Qarasaasiaqarnikkut atortorissaarutit pillugit
• Pisortani oqartussaaffeqarfinnik pikkorissartitsinikkut, saqqummiussinikkut workshoppertitsinikkullu cyberimi paasissutissanilu isumannaallisaaneq pillugu paasisanik annertusaaneq
• Atortorissaarutinik isumannaallisaaneq (assersuutigalugu isertaatinik nakkutiginninneq, allagaatinik isertuussanik qularnaarineq il. il.)

ISMS-imik atortorissaarutip iluatsittumik atuutilersinnissaanut aqutsisut patajaatsumik pigiliusseqqanerat aqutsisullu kajumissuseqarluarnerat pingaaruteqarluinnarput, taamaattumillu qitiusumik allaffeqarfiup cyberimi paasissutissanilu isumannaallisaanermut ajortumeerinianut patajaatsuunissaata annertusinissaa aamma pingaaruteqarluni. 

Taamaattorli cyberimi paasissutissanilu isumannaallisaaneq ataavartumik allanngoriartortuaannarpoq, tamannalu ilutigalugu oqartussaaffeqarfiup sillimaniarnerata qaffasissusaata pitsaasumiitittuarnissaannut aqutsisuusut suliassaminnut piareersimaneqartinngikkunik ataavartumik pitsaasumillu suliassamik naammassisinnaanissaat naatsorsuutigineqarsinnaanngilaq. 

Taamaattumik aqutsisut piukkunnarsarneqarnissaat Cyberimi Paasissutissanilu isumannaallisaanermut immikkoortortaqarfimmit anguniarneqarpoq, taakkulu immikkoortortaqarfimmi paasissutissani isumannaallisaanerat akisussaaffigissavaat, kiisalu siunissami ungasinnerusumi qitiusumik allaffeqarfimmi immikkoortortaqarfinni tamani malittarisassat nukittujuaannartinnissaat qulakkeerniarlugu, aqutsisunut ilinniartitsinissamut pilersaarutinik pilersitsisoqassalluni.