Pitu

PITU-mi ilaasortat assersuutigalugu inuup normuinik aallernissaminnut inatsisitigut tunngavissaqarunik, tamanna pisariitsumik PITU-kkut isumagisinnaavaat. Assigisaanik paasissutissanik allanik ilaasortat aallersinnaapput, imaluunniit nammineq paasissutissaatitik allanut atorneqarsinnaalersillugit saqqumitissinnaallugit. Pisortaqarfiit suliffeqarfiillu ilaasortaasut amerlanerulerpata, pisortaqarfinni ataatsimut paasissutissanut tunngatillugu suleqatigiinneq pitsaanerulissaaq. Paasissutissat pisariitsumik isumannaatsumillu suliffeqarfinni taamatut atorneqarsinnaalerpa, siunissami suliffeqarfinni ataasiakkaani sulineq pisariinnerulersinnaavoq, pissutigalugu suliffeqarfiit tamarmik immikkut paasissutissanut nalunaarsuiffiliortitsisarnissaat pisariaarutissagami.

Tamatuma saniatigut PITU-mi qulakkeerneqarpoq:

• Paasissutissanik siammarterinermi assigiissaarineq, atoruminartuutitsineq isumannaatsumillu aaqqiissuteqarneq.
• PITU-mi paasissutissat pissarsiarineqarsinnaasut suunersut ataatsimut takussutissiarineqarnerat.
• PITU-mi attaveqaataaneersumit paasissutissanik saqqummiussanik pissarsisinnaanissaq.
• Paasissutissanik pigisallit paasissutissaatitik kikkunnit pissarsiarineqarsinnaanissaannik aalajangiisinnaanissaat.
• Paasissutissanik PITU-miittunik atuinikkut qulakkeerneqartarpoq, paasissutissat atorneqartut nutarterneqarsimajuaannarneri, taamaalillunilu saniatigut nalunaarsuiffinnik pilersitsiortornissaq pinngitsoortinneqarsinnaavoq.

Ilaasortat akiliutigisartagaat atorlugit Digitalinngortitsinermut Aqutsisoqarfimmit PITU-p ingerlanneqarnera isumagineqarpoq; tassa imaappoq atassuteqarfik taanna imminut aningaasalersorpoq, ilaasortallu amerlassusaat aallaavigalugu akit aalajangersagaallutik. Ilaasortat amerlaneruleraangata, ilaasortaaneq akikinnerulertarpoq.

Ataasiartumik akiligassaq
Aallartinnermi PITU-mi isumannaallisaanermut serverimut attavilersinnermut 10.000 kr. akilerneqartarpoq.

Ingerlaavartumik ingerlatsineq
Isumannaallisaanermut servereqarnissamut PITU-mi lincenseqarneq qaammammut 2.000 kr.-eqarpoq.
PITU-mi ilaasortaaneq qaammammut 500 kr.-eqarluni.

Taakkua avataatigut aningaasartuutit, soorlu assersuutigalugu webservicenik ineriartortitsinerit, pisortaqarfimmit nammineq isumagineqassapput.

PITU-mi ilaasortanngorusukkussi, taava Digitalinngortitsinermut Aqutsisoqarfimmut qinnuteqassaasi uunga mailerlusi: pitu@nanoq.gl. Mailimi allassavarsi PITU qanoq atorusunnerlusiuk. Digitalinngortitsinermut Aqutsisoqarfiup qinnuteqaatersi akuerippassuk, immersugassamik PITU-llu atornerani malittarisassanik nassinneqassaasi. Immersuiffissaq atsioriarlugu pitu@nanoq.gl-mut utertinneqassaaq. Taamaalioreerussi Digitalinngortitsinermut Aqutsisoqarfiup ilaasortaanermut uppernarsaat, ilitsersuutit, kiisalu tekniskimut uppernarsaat nassiutissavaat.

Naatsumik oqaatigalugu ilaasortat nutaat imaaliussapput:

1. Ilaasortaanissamut qinnuteqassapput
2. Qinnuteqaat akuerineqareerpat: immersugassaq atsiorlugu
3. Ilaasortaanermut uppernarsaat ilitsersuutillu Digitalinngortitsinermut Aqutsisoqarfimmit pissarsiarissavaat
4. PITU-mut isumannaallisaanermut serveri ikkutissavaat
5. PITU-mut isumannaallisaanermut serveri PITU-mi attaveqaammut nalunaarsorneqassaaq
6. PITU subsystemimi ilanngunneqarlunilu nalunaarsorneqassapput
   
   

PITU-p aaqqissuussinermi suliarineqartussat tulliuttut piumasarisat aallaavigalugit isumagineqassapput, apeqqutaalluni paasissutissanik saqqummersitsisoorusunnerluni, paasissutissanik aallertarusunnerluni, imaluunniit taakku tamaasa periarfissaatikkusunnerlugit.

Paasissutissanik saqqummersitsiniaraanni uku iliuuserineqassapput:

1. Webservicet nalunaarsorneqassapput
2. Isumannaallisaanermi serveri webservicellu attavilerneqassaat qulakkeerneqassaaq
3. Webservicenut saqqummitsitat iserfigineqartarnerinut aqutsineq
   
   

Paasissutissanik aallertarniaraanni uku iliuuserineqassapput:

1. Paasissutissanik saqqummersitsisut aallerfiginiakkat isumaqatigiissusiorfigineqassapput
2. Paasissutissanik saqqummersitsisut aallerfiginiakkanit isertaammik pissarsisoqassaaq
3. Paasissutissanik aallertup programmiisa isumannaallisaanermillu serverimut attavilerneqarnissaat isumagineqassaaq
4. Webservicemik pissarsineq