Inuit normuinut nalunaarsuiffik (CPR) aamma suliffeqarfiit normuinut nalunaarsuiffik (CVR)

Inuit normuinut nalunaarsuiffimmi paasissutissat innuttaasut ataasiakkaat kinaassusaat pigineqarput, matumani aqqi, najugaat, inuuii aappaqarnerinullu tunngasut nalunaarsugaapput. Suliffeqarfiit normuinik nalunaarsuiffimmi suliffeqarfiit suliaat pillugit paasissutissat pigineqarput, matumani aqqi, najugaat, piginnittuunermut tunngasut aamma suliffeqarfiit sulerisuunersut.

Nalunaarsuiffiit taakku marluk pisortani namminersortunilu allaffissornikkut pingaaruteqarluinnartumik inissisimapput. Nalunaarsuiffiit taakku siunertaraat eqqortumik pitsaasumillu sullissinissaq qulakkeerneqassasoq, assiganillu innuttaasunut suliffeqarfinnullu pissutsit erseqqissumik takuneqarsinnaanissaat.

Inuit normuinut nalunaarsuiffik aamma Suliffeqarfiit normuinik nalunaarsuiffik atorsinnaanngorlugit suliarineqareerput.

Inuit normuinut paasissutissat illersugaapput, oqartussaasunillu akuerisaasunit inunnillu paasissutissanik atuinissamut tunngavissaqartunit taamaallaat ammarneqarsinnaapput.

Akerlianik Suliffeqarfiit normuinik nalunaarsuiffik tamanut ammavoq, taamaattumik paasissutissat amerlanerpaat kikkunnilluunniittakuneqarsinnaallutik. Suliffeqarfiit normuinik nalunaarsuiffik iserfigineqarsinnaavoq paasiissutissallu takuneqarsinnaallutik uani cvr.dk.

Innuttaasunut

Inuit normuinut nalunaarsuiffik illit innuttaasutut pisortani suliffeqarfiit namminersortullu attaveqarfiginissaannut pingaaruteqartuuvoq.

Inuttut normut atorlugit paasissutissat ilinnut tunngasut sukkasuumik iserfigisinnaavatit, taamaalillutit inuttut paasissutissat ilinnut tunngasut tamatigut allattariaqarneq ajorpatit. Assersuutigalugu najukkat allanngortikkukku, pisortat atortorissaarutaanni najugaqarfiit nammineq nutartissaaq, taamaasillutit nuunnerit pillugu oqartussaaffeqarfiit assigiinngitsut immikkut paasiteqattaartariaqanngilatit.
Aamma akileraartarnermi nalunaarsuinerit isertitallu nalunaarsorneqarnerini inuttut normut pingaaruteqarluinnarpoq, taamaasilluni paasissutissat eqqortumik Akileraartarnermut Aqutsisoqarfimmut nalunaarutigineqassammata.

Suliffeqarfiit normuinik nalunaarsuiffik aamma ilinnut innuttaasutut atorluarsinnaavat, pingaartumik suliffeqarfiuteqaruit imaluunniit namminersortuuguit. Suliffeqarfiit normuinik nalunaarsuiffik atorneratigut suliffeqarfiutigisat pillugu paasissutissanik sukkasuumik pissarsisinnaavutit. Assersuutigalugu suliffeqarfiup paasissutissaatai nalunaarsorsimasut soorlu najugaq, piginnittuunermut tunngasut imaluunniit suliffeqarfiup suliai nutarterniarukkit, ajornaatsuararsuarmik Suliffeqarfiit normuinik nalunaarsuiffiup qupperneratigut isumagisinnaavatit. Suliffeqarfiit allat suliffinnut suleqatigiinnermulluunniit pingaaruteqartut pillugit paasissutissat nassaarisinnaavatit.

Suliffeqarfinnut oqartussaqarfinnullu

Inuit normuinut nalunaarsuiffik sorpassuarnut atatillugu iluaqutissartaqarput, pingaartumik eqqortumik pitsaasumillu sullissineq aamma inatsimmik malinninnissaq qulakkeerniartillugit.

Inuit normui atorlugit inuit ataasiakkaat kinaassusersinissaannut atorneqartarput, taamaattumik suliffeqarfiit oqartussaqarfiillu ulluinnarni sulinerannut pingaaruteqarluinnartuupput.

Suliffeqarfiit normuinik nalunaarsuiffik aamma suliffeqarfinnut oqartussaqarfinnullu toqqammaviulluinnartumik sakkussaapput. Suliffeqarfiup inatsisitigut akuerisaanerinut, piginnittuunermut pissutsinut aningaasaqarnerullu inissisimaneranut atorneqartarput. Taamaammat assersuutigalugu isumaqatigiissusiortoqartillugu, akuersissutinik qinnuteqartoqartillugu akileraarutiniluunniit naatsorsuisoqartillugu, suliffeqarfiutilinnut oqartussaaffeqarfinnullu aalajangiisuulluinnartarput.

Suliffeqarfiit normuinik nalunaarsuiffik cvr.dk-kkut iserfigineqarsinnaavoq tassanilu suliffeqarfiit pillugit ataasiakkaanik ikkussuisoqartarpoq. Inuit normuisa Suliffeqarfiit normuinik nalunaarsuiffiiniit paasissutissanut iserniaraanni, paasissutissanik agguaassisoq sakkussatut atorneqassaaq.

Paasissutissanik agguaassisoq
Kalaallit Nunaanni Paasissutissanik Agguaassisoq qitiusumik atortussiaavoq pisariaqartitsineq naapertorlugu Inuit normui suliffeqarfiilluunniit normui atorlugit paasissutissanik agguaassisartoq. Assersuutigalugu qarasaasiami atortorissaarummi ‘Digitalimik Nuunneq’ atorneqarpat, paasissutissanik agguaassisoq sakkussatut qitiusutut atorneqassaaq, pissutigalugu inummut paasissutissat illersugassaasut, najukkamullu tunngasut ataqatigiissilersinnaammagit. Kiffartuussissut atorneqartoq PITU-mut atassuserneqarsimasoq atorlugu taamaaliortoqarpoq. Taamaaliornikkut kiffartuussinermi attuumassuteqartut kisiisa isersinnaanissaat, isumannaatsumillu sullissinissaat qulakkeerneqarpoq.

Paasissutissanik agguaassisoqarnerani siunertaavoq digitalinngortitsinerup siuarsarneqarnissaa paasissutissanullu attaveqaasersuutit ataqatigiinnerulernissaat, ilaatigut Nunatsinni pisortanut, suliffeqarfinnut namminersortunullu iluaqutaasussat.

Paasissutissanik agguaassisoq pillugu paasissutissat annertunerusut nassaarisinnaavatit uani.

Attavissaq

Tunngaviusumik paasissutissanut tunngatillugu apeqqutissaqaruit, Digitalinngortitsinermut Aqutsisoqarfimmut saaffiginnissinnaavutit uani digitalisering@nanoq.gl