airplanebooksbriefcase business cogs cross election entertainment fish house law lockmedicalpeopleselfservices socialtax

Pisortaqarfinniit Digitalimik Allakkerineq

Kalaallit Nunaanni Namminersorlutik Oqartussat 2019-imi ukiassariartulernerani pisortanit allagarsiarisartakkat digitalinngortinneqassapput – siullermik piumasut atorsinnaasaannik kingornalu 2020-p aasaanerani pinngitsoorani atugassatut atuuttussanngussaaq.

Aaqqiissut atoraanni Kalaallit Nunaanni pisortatut oqartussanit allagarsiat digitaliusut pissarsiarineqarsinnaapput – tassa sumiluunniit najugaqaraluaraanni. Tamatuma kingunerisaanik allakkat Namminersorlutik Oqartussaneersut, kommunineersut allanillu pisortatut oqartussaasuneersut nassiunneqartartut atorunnaariartorneqassapput.

Allagarsiat digitaliusut pisortanit atorniarneqalernerini a-Boks A/S sullissisuusussatut toqqarneqarpoq. Taamaattumik innuttaasut aamma suliffeqarfiit e-Boksimik atuisooreersut e-Boksiat pioreersoq atorlugu allagarsisassapput.

2020-p aasaanerani innuttaasut 15-it sinnerlugit ukiullit tamarmik e-Boksikkut pisortanit kiisalu suliffeqarfiit pisortanit e-Boksikkut pinngitsooratik allagarsisalissapput, atortorissaarullu kalaallisut qallunaatullu atorsinnaalissaaq.

Pisortatut oqartussaasup nalunaarut innuttaasup e-Boksianut nassiunneqarpat, nalunaarutip tigusisussamut apuussimasutut isigineqartassaaq, taamaattumik innuttaasut suliffeqarfiillu e-Boksitik alakkakulasassagaat pingaaruteqarpoq.

e-Boksimik atuinermi pitsaaqutit ilagivaat, oqartussaasut aamma innuttaasut suliffeqarfiillu akornanni qaninnerulissaaq.

”Nunarsuarmi qeqertat annersaanni najugaqartuusugut immitsinnut ungasippallaarnerput digitalinngorsaanerunitsigut piuneeruttutut issaaq, taamaalillunilu nunamut tamarmut digitaliseeriinermut periusissiami siunertarineqartoq naapertorlugu allakkat digitalikkut nassiussuunneqartalernerisigut immitsinnut suli qaninnerulissaagut” taama oqarpoq Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoq Ane Lone Bagger.

e-Boksi atorniaraanni innuttaasut NemID-mik peqartariaqarput. Innuttaasut NemID-mik peqanngikkunik, NemID.nu aqqutigalugu inniminniisoqarsinnaavoq. Innuttaasuttaaq innuttaasunik kiffartuussivinni najukkaminni ikiorneqarsinnaapput.

Pissutsit immikkut ittuutillugit e-Boksimik atuisuujunnaarnissamut periarfissiisoqarsinnaavoq.

Paasissutissat annertunerusut allat atuarniaraanni uaniipput sullissivik.gl aamma aajuna attavissaq digitalpost@nanoq.gl.