Pisortaqarfinni Digitalimik Ataqatigiittumik Aaqqissuusineq
Kalaallit Nunaata digitalinngoraluttuinnarnera
Pisortaqarfinni Digitalimik Ataqatigiittumik Aaqqissuussineq – PDAA – atorlugu Kalaallit Nunaanni digitalimik pisortat kiffartuussissutaat ataqatigiit, sunniuteqarluartut siunissamillu qulakkeerinnittut pilersissavagut.
Kalaallit Nunaanni pisortaqarfinni suleriaatsimik pitsaanerulersitsisussamik sunniuteqarluarsitsisussamillu digitalinngoriartuaartoqarpoq. Eqqortumik iliorutta annertoorujussuarmik periarfissaqarpoq. Kalaallit Nunaanni digitalinngoriartuaarnitsinni pisortaqarfinni digitalimik ataqatigiimmik suleqatigiinnissap anguneqarnissaannut, kommunit oqartussaaffeqarfiillu aaqqissuussineq ataaseq malillugu suleqatigiinnissaat pisariaqartipparput. Tamanna PDAA-mi siunertarineqarpoq.
Digitalimik ataqatigiittumik aaqqissuussineq pitsaassuseqarnerulersitsivoq
Innuttaasut ukiumoortumik nalunaarusianik immersuitillugit, pisaminnik nalunaaruteqartillugit allatigulluunniit kommuninut oqartussaaffeqarfinnullu attaveqartartillugit, atortut periutsillu assigiinngitsut atorneqartarput. Taamaattuarallassaarlu. Digitalimik aaqqissuussussineq ataatsimoortoq atorneqanngippat atortut periutsillu imminnut atassuserneqarsinnaanngitsut atorneqaannassappata, suleriuseq akisooq ingerlanneqarsinnaavoq. PDAA aqqutigalugu kommunini oqartussaqarfinnilu allani digitalimik aaqqiissutit pitsaasuussasut ataqatigiissinnaanerallu qulakkeerneqassaaq, taamaalilluta pisortaqarfinni digitalimik immikkoortoqarnitsinni iluaqutit atorluassavagut.
Tamanna angusinnaagutsigu innuttaasut suliffeqarfiillu sunniuteqarluartumik, ataqatigiittumik ammasumillu kiffartuunneqassapput – aamma pisortaqarfinni sulisut digitalimik ataatsimoorussami pitsaanerujussuarmik innuttaasunut kiffartuussinissaat periarfissaalluarnerujussuussaaq.
Ataatsimoorluta PDAA atuutilersissavarput
Oqartussaqarfiit akimorlugit suleqatigiinnitsigut pisortaqarfinni digitalinngorsaanerniit iluaqutit pissarsiarisinnaavagut. Taamaattumik Digitalinngortitsinermut Aqutsisoqarfiup, kommunit, Namminersorlutik Oqartussani Qitiusumik Allaffeqarfiup taakkulu suliffeqarfiutaasa akornanni ataatsimoorussisoqarneratigut PDAA pilersinneqassaaq. Digitalinngortitsinermut Aqutsisoqarfik suliniutip aqunneqarneranut akisussaasuuvoq, kisianni aqutsisunik, IT-mik akisussaasunik pisortaqarfinnilu digitalimik ataqatigiittumik aaqqissuussatsinni oqartussaaffeqarfinni ataasiakkaani sulisunik peqataatitsinissarput pisariaqartipparput.
PDAA makkununnga iluaqutaassaaq:
- Digitalimik suleriutsinik pisariillisaaneq
- Paasissutissanik pitsaanerusumik avitseqatigiinneq akimorlugulu suleqatigiinneq
- Digitalimik aaqqiissuteqarnikkut aningaasartuutikinnerulerneq sulisunillu atuinikinnerulerneq
- Pisortaqarfinni digitalimik aaqqiissuteqarnerit akimorlugit assigiissaarinerulerneq ataqatigiinnerulernerlu