4. Paasissutissat isumannaatsuutinneqarnerat
Paasissutissanik akisussaasuusup isumagissavaa paasissutissat susassaqanngitsunit ilisimaneqalinnginnissaat, atornerlunneqannginnissaat aamma imaluunniit inatsisinik unioqqutitsisumik suliarineqannginnissaat. Tamanna aamma paasissutissanik suliarinnittartunut atuuppoq.
Tamatuma ilaatigut nassataraa, suliffeqarfiup imaluunniit oqartussaqarfiup iluani qulakkeerneqassammat taamaallaat sulisut paasissutissanik aalajangersimasunik takunnissinnaatitaasut (teknikkikkut) kisimik paasissutissanik takunnissinnaanissaat qulakkeerneqassammat. Aamma soorunami qulakkeerneqassaaq inuit avataaneersut paasissutissanik takunnissinnaannginnissaat, ass. internetti aqqutigalugu suliffeqarfiit imaluunniit oqartussaqarfiit iluminni attaveqaataannut iserlutik.
Suliffeqarfittut, pisortat oqartussaqarfiattut imaluunniit allamut atatillugu inunnut paasissutissanik suliarinninnermik suliaqaraanni pingaaruteqarpoq paasissallugu paasissutissanut akisussaasuunerluni, imaluunniit paasissutissanut akisussaasoq sinnerlugu paasissutissanik
suliarinnittartuunerluni.
Pingaarnerpaaq tassaavoq, kina inatsisitigut aamma/imaluunniit aalajangiisoorpiarnersoq, paasissutissat inunnut tunngasut qanoq suliarineqassanersut. Naatsumik oqaatigalugu paasissutissanut akisussaasuusup paasissutissat oqartussaaffigai, aamma paasissutissat paasissutissanik suliarinnittartumiinneranni.
Paasissutissanut akisussaasuusoq tassaasinnaavoq oqartussaqarfik inatsisitigut pisussaaffilerneqarsimasoq, paasissutissanik inunnut tunngasunik aalajangersimasunik suliaqassalluni. Paasissutissanut akisussaasoq aamma tassaasinnaavoq sulisitsisoq, sulisorisani aamma atuisuni pillugit paasissutissanik suliarinnittartoq, imaluunnit nakorsaq, ilisimatusarnermut atatillugu imaluunniit sulinerminut atatillugu napparsimasut pillugit paasissutissanik
suliarinnittartoq.
Paasissutissanik suliarinnittartup ilisarnaatigaa paasissutissanik inunnut tunngasunik taamaallaat suliaqartarami paasissutissanik akisussaasuusoq sinnerlugu (malittarisassaqarluni). Pasissutissanik suliarinnittartoq paasissutissanik inunnut tunngasunik nammineq atugassamisut siunertaqarluni suliarinninneq ajorpoq, taamaattumillu aamma paasissutissanik akisussaasuusup suliakkiutaa naammassiniarlugu suliarinninnerup saniatigut paasissutissat tunniunneqartut allanut atussanagit. Paasissutissanut akisussaasuusumi sulisunut aamma tamanna atuuppoq.
Paasissutissanik suliarinnittartoq ass. tassaasinnaavoq suliffeqarfik, suliffeqarfiup allap imaluunniit oqartussaqarfiup it'eqarnikkut systemiinik ingerlatsinermik suliaqartoq. Paasissutissanik suliarinnittartoq aamma tassaasinnaavoq webhotelimik ingerlatsinermik neqerooruteqartoq, allat sinnerlugit nittartakkat ingerlanneqarnerannik suliaqartoq, allaffeqarfiup paasissutissanik akisussaasoq sinnerlugu akiitsunik akiliisitsiniarnissaa pissutigalugu paasissutissanik tunineqartartoq.
Paasissutissanut akisussaasuusutut paasissutissanik suliarinnittartumik atuigaanni paasissutissanik suliarinnittartoq tamatumunnga isumaqatigiissummik atsioqatigineqassaaq (paasissutissanik suliarinnittartumut isumaqatigiissummik taaneqartartumik). Paasissutissanik suliarinnittartunut isumaqatigiissutinut taamaattunut piumasaqaatit Datatilsynip nittartagaani annertunerusumik paasisaqarfigisinnaavatit.