IT-eqarnikkut ingerlatat avataaneersunit suliarineqartut

Digitalinngortitsinissamik periusissiaq naapertorlugu Naalakkersuisut aalajangerput pisortat ingerlatsiviini IT-eqarnikkut atortulersuutinik pisiniarnermi aqutsinermilu siuarsaanermik aamma suliat ilisimaarilluarnissaannut immikkut iliuuseqartoqassasoq. IT-eqarnerup ingerlanneqarnissaanut, aamma IT-eqarnerup avataaneersunit suliarineqartarnerinik  siunnersorneqarnissamik kiisalu pineqartuni misilittakkat pitsaasut ingerlatsiviit akornanni ingerlateqqinneqarsinnaanerinut tunngasunik suliaqartussamik Namminersorlutik Oqartussat 2014-imi suliariumannittussarsiuussipput.  

Misilittakkat takutippaat IT-eqarnikkut ingerlatsinerup avataaneersunit ingerlanneqartup suliassartaata ilisimaarilluarnissaanik suliaqarnerup pingaartinnissaa imminut akilersinnaasoq. Taamaattumik ataqatigiissaakkamik suliniarneq aallartisarneqarpoq, suliffeqarfiit misilittakkaminnik pitsaasunik akunnerminni ilinniarfigeqatigiiffissaannik, aamma ilisimasaminnik avitseqatigiiffigisinnaasaannik, IT-eqarnikkut ingerlatsinerup avataaneersunit ingerlanneqartup pisiortornikkut aqutsinikkullu pitsaanerpaamik qanoq suliarineqarsinnaaneri pillugit.

Suliniarneq Digitalimik Sullissinermut Aqutsisoqarfimmit aallaaveqarpoq, suliffeqarfiit akornanni  ilisimasanik avitseqatigiinnissamik aamma sullissinissamik, kiisalu pisortat ingerlatsiviini IT-eqarnikkut ingerlatsineq siuarsaanerlu pillugit malinnaanissamik suliaqartussatut inissisimasumi.