Kotterip allannguinissamut periusia

Allannguinissamut periuseq arfineq pingasunik immikkoortulik John Kotterip 1996-imi ineriartortippaa

  1. Pisariaqarneranik misigisimalersitsigitsi

    Suliffeqarfik imminut naammagisimaarpat allannguinerit naammassineqarnissaat ajornakusuussapput. Suliffeqarfiit imminnut naammagisimaaraangata, tamanna assersuutigalugu pissuteqartarpoq siornatigut malunnaatilimmik ajornartoornernik imaluunniit pitsaanngitsunik naammassisaqarnermik takusaqarsimannginnermik.

    Allannguinissap ingerlannerani pingaaruteqarpoq aqutsisut aamma sulisut allannguinissap pisariaqartinneqarneranik aamma pisariaqavinneranik qularunnaarsinneqarnissaat. Pisariaqavinneranik misigisimanatik sulisut immikkut iliuuseqarnissaminnut, amerlasuutigut pingaarutilimmik inissisimasartumut, piumassuseqassanngillat.

    Kotter malillugu aqutsisut amerlasuutigut ilimagineq ajorpaat sulisut ilorrisimaarfimminnit nikisinnissaat qanoq ajornakusoortigisoq, imaluunniit aamma aqutsisoq naammagittaappallaarpoq.

  2. Suleqatigiinnik toraagalimmik ineriartortitsigitsi

    Allannguinissamut aqutsisoq ataaseq siuuttorissallugu naammanngilaq. Allannguinermik suliaqarnerni annertunerusuni suleqatigiit suleqatigiilluartut pisariaqartinneqarput, siuuttutut aqutsisumik, immikkoortortani aqutsisunik, suleqatigiinnut aqutsisunik aamma sulisunit peqataaffigineqartumik – inuit pisussaaffigalugu aamma pisussaaffiginagu pissaanillit. Suleqatigiit peqatigiillutik allannguinermik aqutsissapput. Tamanna tatigeqatigiinnermik aamma ataatsimoorussamik anguniagaqarnermik pisariaqartitsiffiuvoq.

  3. Anguniagassamik aalajangersaagit

    Allannguinissamut anguniagaq pingaaruteqarpoq, pissutigalugu tamanna piumassuseqalersitsisinnaammat, isumassarsisitsisinnaammat aammalu sulisut akornanni iliuuseqarnermik pilersitsisinnaammat. Anguniagaq suunersoq sulisut ilisimanngikkunikku, taannalu aalajangiinerminnut malittaralugu, aalajangiisussanngornerit tamaasa oqallinnernik pilersiffiusinnaavoq. Aalajangiinerit annikikkaluilluunniit aporaassutigineqarsinnaapput.



    Allannguinerit, Kotter malillugu, iluatsinngitsoorsinnaapput anguniakkat pilersaarutinut aamma programminut paarlaanneqaraangata, imaluunniit aqutsisup anguniagaa paasiuminaappallaarlunilu ersernerluppallaaraangat. Aqutsisutut allannguiniarluni suliassami anguniarneqartoq nassuiarsinnaasariaqarpat, aammalu paasineqarnermik soqutiginninnermillu utertitsiffigineqarlutit.



    Anguniagaq sunniuteqarluarsinnaasoq tassaavoq: Eqqarsaatigineqarsinnaasoq, kissaatigineqarsinnaasoq, piviusunngortinneqarsinnaasoq, aallussiffiusoq, eqaatsoq aamma siaruarteruminartoq. 

  4. Anguniagaq ilisimatitsissutigiuk

    Pingaartuuvoq sulisut sapinngisamik amerlanerpaat anguniakkamik paasinnillutillu akuersaarnissaat. Suliffeqarfiit amerlanersaasa ilisimatitsinissaq sunniuteqartussaanngitsutut isigisarpaat. Aqutsisumit oqaaseqaat imaluunniit oqalugiaat naammanngisaannarpoq. Anguniagaq pillugu ilisimatitsisarneq ingerlaavartumik pissaaq. Anguniagaq e-mailini, ataatsimiinnerni, saqqummiussinerni il.il innersuussutigineqartassaaq.



    Iliuuseqarneq tamatigut oqaatsinit sakkortunerusartoq Kotterip oqaatigaa. Taamaattumik aqutsisoq, allannguinermi siuuttuusoq tamatigut ”oqaatsiminik timitaliisassaaq”. Allannguiniarnerup tunngavimmigut qajannarsisinneqarsinnaanera annertunerpaajusarpoq inuit qitiusumik inissisimasut namminneq allat qanoq iliornissaat pillugu oqaatigisaminnut akerliusumik pissusilersoraangata.

  5. Aqqutaani akimmiffiit piiakkit, aammalu sulisut piginnaasaqarfii qaffassarlugit

    Pilersitsinerit nutaat maangaannartarput, sulisut – anguniakkamik nutaamik akuersigaluarlutik – allannguinerup naammassiniarnerata ingerlanerani tamatigut aporfissaqartarnera pissutigalugu soriarsinnaanngitsutut misigisarmata.



    Kotter naapertorlugu tamakku tassaasinnaapput aaqqissugaanermut tunngasut, soorlu atorfinni suliassanut nassuiaat imaluunniit akissarsianut systemit, imaluunnit sulisunut aqutsisoq pisunut nutaanut naleqqussarumanngitsoq. Sulisut aamma soriarsinnaanngitsutut misigisarput piginnaasaqarfigisassat eqqortut piginngikkaamikkit. Taamaattumik sulisut piginnaasaqarfissatut pisariaqartitamikkut ineriartortinneqarnissaat aqutsisup isumagissavaa.

  6. Piffissap sivikitsup iluani iluanaarutaasussanik aamma pilersitsigit

    Allannguinerit piffissamik sivisuumik atuiffiusarput, siuariartornerallu unissinnaavoq piffissap sivikitsup ingerlanerani anguniagassanik, anguneqarsinnaasunik aamma nuannaarutaasinnaasinnaasunik ilaqanngikkaangamik. Sulisut aqutsisulllu, Kotter malillugu, qaammatit arfinillit 18-illu ingerlanerini suliat inernerinik takusaqarsinnaasariaqarput. Taakku suliamik naatsorsuutigineqartutut angusaqarfiuneranut uppernarsaatinik takussapput. Taamaattoqanngippat amerlasuut tunniutiinnassapput, imaluunniit akerlilersuisunngorsinnaallutik.



    Taamaattumik aqutsisup uppernarsassavaa pilliutit asuliinnaanngitsut – allannguinissaq pisariaqarsimasoq. Pitsanngoriaatit malunnaatillit allannguinissap pisariaqartinneqartup akerliusunit kigaallassarneqartuarnissaa ajornakusoortilissavaa. Piffissap sivikitsup iluani pitsanngoriaatit anguniagassalersuinikkut aqutsisup takutissavai, anguniakkat eqquutitissallugit aammalu tamatumunnga akuusut nersualaarinninnermik akilerlugit. 

  7. Aalajangiusimanniinnarit

    Aqutsisut amerlasuut allannguinissamik suliami angisuumi, ukiut arlalialuit ingerlareerneranni saqqummiussinikkut pitsanngoriaammik siullermik takusaqarunik, ajugaaneq nalunaarutigissallugu ussernartorsiutigisinnaavaat. Siuariaat nuannaarutigineqassaaq, kisiannili suliaq suli naammassinngilaq. Allannguutit suleriaatsimut ikkutivissimannissaasa tungaannut, ukiut pingasuniit qulit tikillugit ingerlaneranni pisinnaasumi, nutaat suli qajannarput, aammalu maangaannarnissaminnut qanitsuararsuarmiillutik. Aqutsisup tamanna isumannaallisassavaa ingerlaavartumik allannguinissamik suliniutinik annikitsukkuutaanik aallartitsisarnermigut. 

  8. Allannguineq suliffeqarfimmi suleriaatsimut tunngaviulersiguk

    Allannguinerit taamaallaat attanneqarsinnaapput ”maani taama iliortarpugumut” killippata. Allannguinerit inooriaatsimi aammalu pingaartitanut sorlanitsinnagu ajalusooriiaannaassapput, allannguinissamut ilungersorneq peerniariarpat. Aqutsisutut allannguutit attanneqarsinnaanerat qulakkeersinnaavat, sulisut periaatsimikkut aamma isumammikkut iliuusaasa aalajangersimasut allannguinerup anguneranut qanoq pissutaaqataasimanerat takutillugu.