Inatsisiliorneq

Inunnut paasissutissaateqarfinnik aqutsineq

Maannakkut inunnut paasissutissanik atuineq nalunaarsuisarnermik inatsisinik 1978-imeersunik peqqussut taamatullu sulianik ingerlatsisarneq pillugu inatsit nipangiussisussaatitaanermullu tunngatillugu pinerluttulerinermut inatsit malillugit aqunneqarpoq. Nalunaarsuisarnermik inatsisit ullutsinnut naleqquttuunngitsutut nalilerneqarput tamannalu inunnut paasissutissanik paarlaateqatigiittarnermut NemID-millu atuilernermut tunngatillugu oqartussaasunut namminersortunullu arlalinnik unammilligassartaqarpoq. Pissutsit taamaannerattaaq kalaallini inuiaqatigiinni digitaliseereeqqinnissamut kigaallassaataavoq.

Inunnut paasissutissaateqarfinnut inatsisinut tunngaviuvoq Europamut tunngatillugu nunat tamalaat isumaqatigiissutaat Europarådemit akuersissutigineqartoq. Taanna EU-mi atugaavoq paasissutissaateqarfinnik illersuinermut ilitsersuutikkut. Nunat EU-mut ilaasortaasut taamatuttaaq Danmark tamanna tunngavigalugu ukiut qulikkaat marluk ingerlaneranni nutaamik inunnut paasissutissat pillugit inatsiseqalerput.

Nunat EU-mut ilaasortaanngitsut nunanulli EU-mut ilaasortaasunut attaveqartut annertunerusutigut ilitsersuummi malittarisassanut naapertuuttumik nunaminni inatsisissatik ilusilersortarsimavaat. Taamaaliortoqartarpoq nunat EU-mut ilaasortaanngitsut qularnaatsumik nunatut isumaqatigiissummut ilaanngitsutut akuersissutigineqarumallutik qinnuteqarsinnaammata. Taamatut akuersissutigineqarneq ilaatigut isumaqarpoq nunat EU-miittut killeqarfiisigut killeqanngitsumik paasissutissat inunnut tunngassuteqarluinnartut paarlaateqatigiissutigineqarsinnaanerannik.

Kalaallit Nunaat ullumikkut taamatut akuersissummik peqanngilaq taamaammallu paasissutissanik paarlaassinernut tamanut nunani allani nunatsinnilu kattuffinnut isumaqatigiissuteqartassalluni Danmarkimi Datatilsynimit akuersissutigineqartussanik imaluunniit pisut arlaanni Danmarkimi Datatilsynimit akuersissutiginagit isumaqatigiissutigineqarsinnaasunik, takuuk inunnik paasissutissaateqarfik pillugu inatsimmi § 27, imm. 5. Taamaaliortoqassappalli pisariaqarpoq kattuffik Kalaallit Nunaanniittoq inunnik paasissutissat isumannaatsumik suliarineqarnissaannut pitsaassusissanik naammassinnissimassasoq, taamatuttaaq inunnut paasissutissanut inatsimmik tamakkiisuusumik peqarnissaq.

Inunnut paasissutissaateqarfinnik aqutsinerup suliarineqarnera tunngaviusumik paasissutissanik nutarterineq inatsisitassaalu Digitaliseeriinermut ilioriusissat 2014-17-imi ”Digitalisering ingerlatsissutitut”-miittut sammisat ilagaat.  Sulineq aallartinneqareerpoq 2015-imilu upernaakkut naalakkersuinikkut isummernissamut tunngavissiaq piareersimassasoq siunniunneqarluni.

Pisortani Oqartussaasut Nalunaarsuiffii pillugit inatsit nr. 294 takuuk

Namminersortut nalunaarsuiffii pillugu inatsit nr. 293 takuuk