Pisortani Digitalimik Allakkerineq

Innuttaasut suliffeqarfiillu pisortatut oqartussaniit ulloq 1. april 2020-miit atuutilersumik digitalimik allagarsisalernissaannut periarfissiisumik Pisortani Digitalimik Allakkerineq pillugu inatsit 2017-imi juunip qaammataani Naalakkersuisunit akuersissutigineqarpoq.

Digialimik Allakkerinikkut pisortatut oqartussaasut aamma innuttaasut suliffeqarfiillu akornanni isumannaatsumik digitalimik attaveqaqatigiinneq periarfissaalissaaq. Digitalimik Allakkerinermik periarfissarititaasoq e-Boksimit ingerlatarineqassaaq.

e-Boks sunaava?
e-Boksi tassaavoq internetsikkut digitalimik allakkerineq, tassanilu digitalimik allakkat pisortatut oqartussaasuneersut pingaarutillit ataatsimut isumannaatsumik katersorneqartarlutik. e-Boksi sumiikkaluaraanniluunniit atorneqarsinnaavoq taamaalilluni qarasaasiaqaraanni, tabletseqaraanni imaluunniit oqarasuaateqaraanni angallattakkamik atorneqarsinnaalluni.

e-Boksip atornera akeqanngilaq aamma e-Boksimik qanoq annertutigisumik atuisoqarsinnaanera killeqartinneqanngilaq.

NemID
e-Boksimut isersinnaajumalluni NemID atorneqartariaqarpoq.

NemID tassaavoq imminut sullinniarluni pisortanut namminerlu inuttut atorfissanut isertaat isumannaatsoq. NemID atorlugu atuisutut ilisarnaatit (bruger-id) isertaatillu assigiit atorneqartarput, tassa soorlu netbankimut, pisortat nittartagaannut aamma nammineq inuttut atuiffiusunut internetsimiittunut.

NemID atorlugu iserniaraanni atuisutut ilisarnaat (bruger-id) toortaqqaassaaq taavalu isertaat toortarneqassalluni. Tamatuma kingorna nøglekortimiit kode-q imaluunniit NemID-mut app-eq atorlugu akuersissut toortarneqassaaq.

NemID pillugu paasissutissat allat uani atuarsinnaavatit

Atuisuujunnaarsitsineq
Kalaallit innuttaasut 15-ileereersimasut tamarmik suliffeqarfiillu Kalaallit Nunaanni CVR-imut nalunaarsorsimasut tamarmik digitalimik allakkerivimmik atuinissaminnut pisussaaffeqarput, taannami atorlugu pisortatut oqartussaasunit allagarsiassanik digitaliusunik pissarsisarnissamut periarfissaassaaq. Taamaattoq immikkut ittumik inissisimagaanni atuisuujunnaarsitaasoqarsinnaavoq.

Innuttaasut taamatut inissisimasut kommunerisaminni Innuttaasunik Kiffartuussivimmut takkullutik saaffiginninnermikkut Digitalimik Allakkerisarnermit atuisuujunnaarsitaanissaminnut nalunaaruteqariartorsinnaapput. Innuttaasut suliffeqarfiillu atuisuujunnaarsitaasarnerannut tunngavissat 2019-ip ingerlanerani ukiakkut saqqummiunneqarumaarput.

Pisortatut oqartussaasunut immikkut ittut
Pisortatut oqartussaasut e-Boksi aqqutigalugu allagarsisarusuttut suliffimminni atortorissaarutiminnit e-Boksimut attaveqalernissartik namminneq akisussaaffigissavaat. Tamannali Digitalimik Sullissinermut Aqutsisoqarfik suleqatigalugu pissaaq, pissutigalugu attaveqalernissaq pitinnagu attaveqalernissamut isumaqatigiissut atsiorneqaqqaartussaagami.

Digitalimik allakkerisarnermut ikaarsaarnissaq pillugu paasissutissat atortussallu Digitalimik Sullissinermut Aqutsisoqarfimmit ataavartumik nassiussuunneqartarumaarput.

Attavissaq
Digitalimik Allakkerineq pillugu apeqqutissaqaruit Digitalimik Sullissinermut Aqutsisoqarfik attaveqarfigisinnaavat uunga digitalpost@nanoq.gl.