Silap pissusaa pillugu aaqqissuussinermit TOQQAANNARNEQ

Nuna tamakkerlugu innuttaasut soqutiginnittut silap pissusaa pillugu aaqqissuussineq tamanut ammasoq, Katuami  sisamanngornermi 19-iani ingerlanneqartoq, kalaallit danskisullu malinnaaffigisinnaasimavaat.

Qarasaasiat marluk assiliivilerlugit mikrofonilerlugillu aaqqissuussamik immiussitinneqarput. Mikrofonip aappaa nutserisumut atassuserneqarpoq, aappaalu saqqummiussisunut atassuserneqarluni. Digitalimik Sullissinermut Aqutsisoqarfiup nittartagaatigut linkit marluk aqqutigalugit oqaatsit marluk arlaat toqqarlugu malinnaasoqarsinnaavoq.

Misileraataavoq, iluatsilluarporlu, Tony Ditlevsdal, Digitalimik Sullissinermut Aqutsisoqarfimmi it-qarnermut aqutsisoq oqaluttuarpoq. Angerlarsimaffimmiit oqallinnermut siunissami malinnaasoqarsinnaalissaaq, piffissap sivisunngitsup ingerlanerani aaqqiissut atorsinnaalersissallugu anguniaratsigu. Naalakkersuisut digitalinngortitsinissamik periusissiaanni anguniarneqartoq piffissap sivisunngitsup ingerlanerani piviusunngortissinnaanngussavarput  – tassa attuumassuteqartut tamarmik sumiikkaluarunilluunniit ilisimasanik pissarsisinnaallutillu oqallinnernut peqataasinnaanngussasut. Tamat oqartussaaqataaneranni alloriarneq pingaaruteqarpoq, attaveqaatitigut periarfissagissaarnerulerluni aammalu oqaloqatigiinnerit annertusarneqarlutik.

Kommuneni, nunallu immikkoortuini avatangiisinut silallu pissusaanut tunngasunik suliaqartunut tamanut tallimanngornermi 20-ani immikkut sammisaqartitsisoqarpoq. 

Silap pissusaanut naleqqussarnermut suliaqarnermi ilisimasamik nutaarluinnarmik, aamma paasissutissanut tunngavimmik nutaamik immikkut sammisaqarnermi saqqummiisoqarpoq. Immikkut sammisaqarneq videokkut peqataasunit aamma takuneqarsinnaavoq.

Peqataasimasut arlallit nalunaarsimapput, nipi tammartaraluarluni attaveqarneq pissutigalugu. Nuannaarutaavoq ataatsimeersuaarnernut ilaasoqarsinnaasoq videokkut malinnaalluni.
Arlallillu qilanaarinerarpaat eqimattakkaarluni sulinermut peqataasinnaanissaq nittartagaq aqqutigalugu.

Peqataasut ilaasa oqaatigisaatut,- aqqut eqqortoq atorlugu ingerlavoq.

Ataatsimeersuarneq Pinngortitamut, Avatangiisinut Inatsisinillu Atuutsitsinermut Naalakkersuisoqarfimmit aamma Danmarks Meteorologiske Institutimit aaqqissuunneqarpoq.