Sarfarissoq Maniitsoq

Isumasioqatigiinneq Sarfarissoq ukioq manna siulleq Maniitsumi ingerlanneqarpoq, ulluni 25.-26. aggusti. Matumani ulluni marlunni isumassarsiorfiulluartumik aamma immikkut sammisaqarfiusunik Qeqqata Kommunia aamma Digitalimik Sullissinermut Aqutsisoqarfik qaaqqusisuupput. Oqalliffissamik pilersitsinissaq siunertarineqarpoq, peqataasut misilittakkaminnik avitseqatigiiffigisinnaasaat digitalilu atorlugu ilinniartitsinerup aamma piginnaasat pitsanngoriartinnissaannut alloranissamut tullermut ingerlaqqinnissaminni isumassarsiorfigisinnaasaat.  

Isumasioqatigiinneq Sarfarissoq naalakkersuisumit Nivi Olsenimit aamma borgmesterimit Hermann Berthelsenimit ammarneqarpoq, digitalinngorsaaneq pillugu isumassarsioqatigiilluni oqallinnermi marluullutik eqeersimaarlutik peqataaffigisaannik. Ullut marluk taakku immikkoortunut sisamanut agguarneqarput, peqataasunit, pisortat namminersortullu ingerlatsiviini assigiinngitsunik tunuliaqartunit, saqqummiussisoqarluni. Digitalinngorsaanerup iluani maanna suliniutigineqartunik, aamma Digitalinngortitsinermut periusissiaq aallaavigalugu siuniussami pisariaqartinneqalersussat pillugit ilisimasanik misilittakkanillu isumasioqatigiinnermi avitseqatigiittoqarpoq. Taamaaliornikkut ammasumik isumassarsioqatigiiffimmik pilersitsisoqarpoq, Qeqqata Kommuniata aamma Digitalimik Sullissinermut Aqutsisoqarfiup qanimut suleqatigiinnerisigut.

Digitalinngortitsinissamik pisariaqartitsineq

Ullormi siullermi meeqqat atuarfiata nalilersorneqarnera sammineqarpoq, digitalimik suliniutit assigiinngitsut arlallit isumassarsiorfigineqarlutik, soorlu Qeqqata Kommuniani e-læring-i aamma Atuarfik Kilaaseeraq pulaarneqarluni. Tamatumunnga atatillugu ersarissumik aqutsineq sammineqarpoq, aamma atuarfinni aqutsisunut kommunalbestyrelsemullu ilaasortanut immikkut sammisaqartitsisoqarluni.  

Digitalinngortitsineruttaaq pisariillisaanermut sullissinerullu pitsanngoriartinnissaanut qanoq aqqutaasinnaanera pillugu peqataasut paasisaqarnissaminnik periarfissinneqarput. Tassami isumasioqatigiinnerup ulluani siullermi sammisassat aappaattut pisortat ingerlatsiviini digitalinngorsaaneq sammineqarmat, periusissiaq aallaavigalugu suliniutini periarfissat pillugit Digitalimik Sullissinermut Aqutsisoqarfik nassuiaateqarluni. Digitalinngortitsinerup aqqutissaanera pillugu soqutiginninneq pisariaqartitsinerlu ullormi siullermi takuneqarsinnaalereerpoq.   

Isumasioqatigiinnerup ulluata aappaani meeqqat atuarfiini digitalinngorsaaneq sammineqarpoq. Tamatumani ilaatigut digitali atorlugu ilinniartitsinernut kommunet suliuniutaat pillugit  saqqumiussinerit arlaqartut aqqutigalugit peqataasut isumassarsiortinneqarlutik.  Digitalinngortitsinermut suliniutit arlaqartut pillugit Ilinniartitaanermut, Kulturimut, Ilisimatusarnermut Ilageeqarnermullu Naalakkersuisoqarfik saqqummiivoq, kommunellu sumiiffimmi meeqqerivinni meeqqallu atuarfiiini iPadit atorlugit suliniutaat oqallinnermi qitiutinneqalerluni. Immikkut sammisaqarnermi uummaarissumi tamatumani peqataasut namminneq iPadit atorlugit ilinniagassalerillutillu atuartinneqarlutik misileraapput. 

 
Alisissumit atuartitsineq aamma nutaamik eqqarsarsinnaaneq pillugit saqqummiussinermut oqallinnermullu ualeq atorneqarpoq. Kiffartuussissummik Granny Cloud-imik Qeqqata Kommuniata atuinera isumassarsiorfigineqarpoq, atuartitsinermik suliaqartut nunarsuarmi tamaneersut  misilittakkaminnik siammarteriffigisaannik. Sumiiffimmi suliniutit ilaat alla tassaavoq ilikkariartortarnermut aamma klassep ilinniartitsiffik allanngortilluinnarlugu ilinniartitsiseriaatsimut   (flipped classroom) tunngasut, ileqqutoqqat malillugit ilinniartitsisup ilinniartitsisarnera qimallugu atuartut ilikkariartornissamut eqeersimaartumik peqataatinneqarnerannik imaqartoq.

Sarfarissoq aqqutigalugu periarfissaq  

Isumasioqatigiinneq Sarfarissoq 2015-imi 2016-imilu ingerlanneqartussat siulleraat. Siunertarineqarpoq ukiumi matumani siusinnerusukkut digitalimik inerititat siammarterneqarnissaat, aamma ilisimasanik siammarteriffissamik isumassarsioqatigiiffissamillu pilersitsinissaq. Klasseni atuartitsiviusuni annikitsumik digitalimik suliniuteqarneq kommunemi atuarfiit akornanni ingerlanneqalernerannik kinguneqarsinnaavoq. Tassanngaanniit periarfissanut nutaanut nunap sinneranit isumassarsiorfigineqarsinnaallutik, taamaaliornikkullu periusissiami suliniutigineqartut pillugit ilisimasat siammarterneqarlutik. Taamaattumik Sarfarissumik isumasioqatigiinnerit nuna tamakkerlugu aallussiffiupput, Naalakkersuisut digitalinngortitsinermut periusissiaannit 2014-17-imit, kommunet qanimut suleqatigalugit, aallaaveqarmata.