Qissartoq – kick-off (aallartitseriarneq) ataatsimeersuarnerlu

Qissartoq peqatigiiffiuvoq Inuit, Suleriaatsit Tunisassiallu pingaartillugit niuernermik ineriartortitsinermi misilittakkanik paarlaassisarneq annertuunillu ingerlatsinikkut iluaqutissat tungaasigut soqutigisaqaqatigiiffinnik tamanik ataatsimoortitsiviusoq.

Qissartoq siunertaqarpoq Kalaallit Nunaanni assigiinngitsut IT pillugu peqatigiiffiinik uummarissaaqqinnissamik, Namminersorlutik Oqartussat, RAL-ip Nukissiorfiillu sulissuteqarnerisigut pilersimalluni. Qissartoq peqatigiiffimmik atorunnaarsimasumik "Nukiit"-mik tunngaveqarluni aallarteriarpoq IT-mi, niuertarfinnik ineriartortitsinermi, digitaliseriiinermi, suleriaatsini piginnaasanilu nukinnik katiteriniarluni, kisiannili maannakkut Kalaallit Nunaat tamakkerniarlugu, Nuummiinnaanngitsoq.

Qissartoq ilisaritinneqassaaq Hotel Hans Egedemmi Kick-off-erluni nalinginnaasumillu ataatsimeersuarluni ataasinngornermi 24. februar Niels Rishede Terkelsen Uddannelses- og Forskningsministeriaqarfimmeersoq aallaqqaasiisutut oqalugiartoralugu, sisamaqiusanngorlugu workshoperluni ataatsimeersuarlunilu. Nereqatigiinnermik aliikkusersuinermillu ulloq naggaserneqassaaq.

Digitaliseriinermut aqutsisoqarfik Qissartoq Kick-off-imi peqataatitaqarluassaaq, suliniutit qanoq ittuusarneri, ingerlaatsit ilusilersorneri, allanngortitsiniarluni aqutsineq digitaliseriinerlu pillugit saqqummiussilluni peqataassalluni.

Ullormut pilersaarut tamakkerlugu peqataaniarlunilu nalunaarnissamut paasissutissiineq tamakkerlugit peqatigiiffiup nittartagaani takusinnaavatit uani, www.qissartoq.gl