Pisortat qarasaasianik atortulersuineq nukingiuppaat

Kommunit, Namminersorlutik Oqartussat pisortanilu suliffeqarfiit allat ataqatigiinnerulernissaannut aammalu qarasaasiatigut atortut Nunarput tamakkerlugu naammassisaqarfiunerusumik atoerlualernissaannut aqutsisoqarfik nutaaq tunngaviliisuussaaq.

IT-iikkut suliassat arlaqartut, Digitalimik Sullissinermut Aqutsisoqarfimmik taallugu Namminersorlutik Oqartussat katersorpaat. Anguniakkat tassaapput pisortat aqutsisoqarfiisa pisariillisarnissaat, naammassineqartartut amerlinissaat aammalu innuttaasut suliffeqarfiillu pisortat ataqatigiinnerusumik sullissinerinik misigisaqalernissaat pilersissallugit.

Kalaallit Nunaanni pisortat digitalimik sullissinerulernissaannut nikeriarnissaanni nutaanik eqqarsarneq, oqaloqatigiinnerit sapiisernerillu pisariaqarput. Taamatut annertuumik nikleriarnissap iluatsinnissaanut Digitalimik sullissinermut Aqutsisoqarfik siuttuussaaq, pisortallu suliffeqarfiinik nutarterinermut siunnersuusiortuussalluni.

”Naammassisaqarfiusumik aqutsinerup qulakkeernissaanut Kalaallit Nunaanni pisortat sakkussaqarnissaat aqutsisoqarfimmik taassuminnga nutaamik qulakkeersinnaavagut. Ataatsimoorussamik ilisimasassat aqutsinermilu sakkussat pisariaqartut siunissami qulakkeerniarpavut”

Aningaasaqarnermut Nunamullu Namminermut Naalakkersuisoqarfimmi pisortaagallartoq Peter Hansen oqarpoq, nangillunilu:

”Kisianni atortut kisimik tamanna naammassisinnaanngilaat, pineqartut aamma tassaammata inuit suleriaatsillu. Atortut ataatsimoorussat atuutilernissaat sivisusarpoq, kisianni ataatsimoorluta suliniuteqarnitsigut suleriaatsit tamanullu atugassiat pilersissinnaavagut, ungasinnerusoq isigalugu qinikkat aalajangiisarnissaannut pitsaanerusunik tunngaviliisinnaasunik”.

Digitalimik sullissilernissamut nikeriarnissaq pisortat ataatsimoorlutik nammakkuminartumik suleqatigiinnerinik tunngaveqarpoq, Digitalimik Sullissinermut Aqutsisoqarfiup suliarfippassuartigut atortulersugaanik, kisianni peqataasutut susassaqartut tamarmik annertuumik akisussaaffigaat, Kalaallit Nunaanni pisortat peqatigiilluta digitalimik sullissinerulernissatta angunissaa.

Digitalimik Sullissinermut Aqutsisoqarfiup ilaatigut akisussaaffigaa, pisortat Paasissutissiinermut Attaveqaqatigiinnermullu najoqqutassaasa atuutilersinnissaat aammalu qinikkat anguniagaat tunngavigalugit suliffeqarfiit suleqatigiisillugit suliniutit piviusunngortinnissaat qulakkiissallugit.

Ilisimasanik ilisimatitseqatigiittarneq, pitsaassutsinik qulakkiineq assigiinnillu atortoqarneq qitiusumik oqaatsitut atorneqarput.