NemID

NemID tassaavoq digitaliusumik atsiorneq

- elektroniskimik atsiorneq, paasissutissanik isertuussassanik mianerisariaqartunillu internettikkut nassitsininni isumannaatsuutitsisoq. NemID-mik periaaseq ataaseq atorneqassaaq, apeqqutaanngilaq netbankikkut akiligassannik akiliiniaruit, kommunemut nuunnerit nalunaarutiginiarukku imaluunniit Akileraartarnermut Aqutsisoqarfiup nittartagaatigut nammineerluni nalunaarsuut aaniarukku.

NemID-imik atuininni atuisutut ilisarnaat ataaseq tamatigut atortassavat

- aamma isissutissaq ataaseq netbankinnut, pisortat nittartagaannut aamma internettimi nammineerluni kiffartuussissutinut arlalissuarnut. Tamanna ilinnut pisariinnerulersitsivoq, aamma pisortat sullissiviini sullissineq pitsaanerulersinneqarluni, ilutigitillugulu pisariillisaaneq annertusarneqarluni.

Illit digitalimik atsiornerit

Atsiornerput nalinginnaasumik pappialamut allattarparput, kinaassutsitsinnut uppernarsaatitut. Pappialamiit digitalimik attaveqaqatigiinnermut pigutta aqerluusaq atorlugu atsiorsinnaajunnaassaagut. Taarsiullugu digitalimik atsiortariaqarpugut. Digitalimik atsiornerit pappialamut atsiornittulli pituttuivoq.

Matuersaatinut korti aamma NemID app’eq

NemID-mut iseruit atuisutut ilisarnaatippit aamma ississutivit saniatigut matuersaatinut korti atussavat. Tamanna isumannaallisaanermik annertunerulersitsivoq, iserniarneq eqqaamasannik – atuisutut ilisarnaatinnik aamma isissutissannik – tigummiannillu matuersaatinut kortinniit atorfissaqartitsiviummat.
Matuersaatinut korti, peqinneqarsinnaalluni akiliutitut angissusiliuvoq, 148-nik matuersaatinik ataasiaannarlugit atugassanik naqinneqarpoq. Systemip kortimit isissutissat arlaat qinnutigisarpaa, saniatigullu nakkutigisarlugu matuersaatinut kortinni qassit sinnerunnersut. Matuarsaatinut kortimi isissutissatit tamarmik atunnginnerini piffissaalluartillugu matuersaatinut kortimik nutaamik nassinneqassaatit.

NemID-mut app’eq aamma App Store imaluunniit Google Play aqqutigalugu aasinnaavat. NemID App’eq, matuersaatinut kortimut pioreersumut tapertatut atugassaavoq.

Qarasaasianit amerlanerpaanit, smartphonenit aamma tabletinit

NemID qarasaasiamut ikkunneqartussaanngilaq, taamaattumillu NemID qarasaasianit allanit illit piginngisannit ajornaatsunnguamik atorsinnaavat. Assersuutigalugu ilaquttavit arlaata qarasaasiaa atorsinnaavat, atuakkanik atorniartarfiup qarasaasiaa atorlugu – imaluunniit nunani allani internettertarfimmi qarasaasiaq atorsinnaavat. Taamaallaat atuisutut ilisarnaatit aamma isissutissat kiisalu matuersaatinut korti nassassallugu eqqaamassavatit.

NemID-mik imak pissarsissaatit

NemID-mik pissarsereersimanngikkuit, assersuutigalugu aningaaseriviit aqqutigalugu www.nemid.nu aqqutigalugu NemID-mik inniminniisinnaavutit, imaluunniit nammineerlutit innuttaasunik sullissivimmut saaffiginnillutit.

NemID pillugu sullissivik.gl aqqutigalugu atuarnerugit.

NemID-p nittartagaa alakkarteruk

Digitalimik Sullissinermut Aqutsisoqarfik pineqartumi oqartussaavoq, ilaatigullu kommunet NemID-mik allaffissornikkut suliaqarneranni ikiorlugit.