Tunngaviusumik paasissutissaq sunaava

Tunngaviusumik paasissutissanut programip siunertaraa tunngaviusumik paasissutissat nutarterneqartarnerisa atorneqarnerisalu ataqatigiissarneqarnissaat

Pisortat tunngaviusumik paasissutissanik arlalissuarnik nalunaarsuisarput, innuttaasunut, suliffeqarfinnut, pigisanut aalajangersimasunut, illuutinut, kortinut il.il tunngasunik. Paasissutissat tunngaviusumik paasissutissanik taaneqartarput, pisortallu sulllissiviini sumi tamaani atorneqartarlutik. Tunngaviusumik paasissutissat pisariitsumik isumannaatsumillu tamanit atorneqarsinnaassapput – pisortanit, suliffeqarfinnit aamma innuttaasunit. Taamaattumik tunngaviusumik paasissutissanut programi pilersinneqarpoq.

Tunngaviusumik paasissutissanut programip paasissutissanik ataqatigiissitsillunilu assigiissaarinissaq qulakkiissavaa
Tunngaviusumik paasissutissanut programip siunertaraa tunngaviusumik paasissutissat nutarterneqartarnerisa atorneqarnerisalu ataqatigiissarneqarnissaat. Paasissutissat pissarsiariuminartuussapput, pisortaqarfinnit sullissivinnillu assigiinngitsunit atorneqarsinnaassallutik. Aammattaaq tunngaviusumik paasissutissat akeqassanngillat, pisortaqarfiillu assigiinngitsut paasissutissanik assigiinnik immikkut nutarterisarunnaassapput.

Tunngaviusumik paasissutissanut programi atorlugu innuttaasut suliffeqarfiillu paasissutissanik assigiinnik pisortanut arlaleriarlutik tunniusisassanngillat, pisortanilu suliffeqarfiit suliaminnik ingerlatsinerminni paasissutissanik pisoqqanik atuinissartik aarlerigissanngilaat. Tamatuma saniatigut namminersorlutik suliffiutillit pisortat tunngaviusumik paasissutissaataannik pissarsisinnaalissapput, tamatumalu kingunerissallugu digitalimik aaqqiissutissanik nutaanik pilersitsisinnaanissaq.

Tunngaviusumik paasissutissat pitsanngorsarniarlugit pisortat suleqatigiipput
Paasissutissat pissarsiarinissaannut pisariillisaanissaq assigiissaarinissarlu angusinnaajumallugit naalagaaffik, Kommunernes Landsforeningi aamma Danske Regioner tunngaviusumik paasissutissat pillugit isumaqatigiissusiorput, pisortani paasissutissaatigineqartut pitsanngorsarneqarnissaat qanoq iliorluni suleqatigiissutigineqarnissaannik imaqartumik.
Suleqatigiinnerup ilaatigut nassataraa ataatsimoorussamik paasissutissanut periuseq, aamma ataatsimoorussamik paasissutissanik siammarterut, pisortat suliffeqarfiinut aamma atuisunut ataasiakkaanut isumannaatsumik aalaakkaasumillu tunngaviusumik paasissutissanik siammarterinissamik qulakkeerinnittussaq.

Tunngaviusumik paasissutissat suleqatigiissutigineqarnerat 2012-imi aallartisarneqarpoq, suliniutissatullu isumaqatigiissutigineqartut tamakkiisumik atuutilersinneqarlutik 2017-imi naammassinissaat naatsorsuutigineqarput. Suliaq pisortat suliffeqarfiini allanngortitsiviuvoq annertooq, amerlasuunit peqataaffigineqartoq, tunngaviusumik paasissutissanut allatseqarfik aqqutigalugu Digitalimik Sullissinermut Aqutsisoqarfimmit ataqatigiissarneqartoq.

Tunngaviusumik paasissutissat, namminersorlutik suliffiutilinnut ineriartuutaasumik naammassisaqarsinnaassutsimullu aqqutissaq 
Ammasumik assigiissaartumillu siammarterisinnaaneq aamma namminersorlutik suliffiutilinnut annertuumik naleqarpoq, suleriaqqinnissaminni pisortat tunngaviusumik paasissutissaataannik atuisinnaagamik, aammalu pisortat paasissutissaataat periutsinut nutaarluinnarnut atorneqarsinnaassammata, pingaartumik digitalimik atugassiissutinut aaqqissutissanullu nutaanut.  

Paasissutissat ammasumik pissarsiarineqarsinnaanerat naatsumik oqaatigalugu siuariartornissamut, naammassisaqarsinnaassutsimut nutaaliornermullu aqqutaasinnaavoq, taamaalilluni suliffeqarfiit nutaat pilersinneqarnerisigut suliffissat nutaat pilersinneqassallutik, suliffeqarfiillu pioreersut sulisussanik nutaanik sulilersitsissallutik, niuernermi tunngaviusumik paasissutissat aallaavigineqarlutik suliassanik suliaqartussanik.