Allakkat Digitalimik – aaqqiissut ataaseq, tamanit atorneqarsinnaasoq

Immersugassat allakkallu tigussaasut ikilisarnissaannik suliniuteqarnissamik Naalakkersuisut Digitalinngorsaanermut periusissiaat imaqarpoq, taamaattumik Digitalimik Sullissinermut Aqutsisoqarfik kommunet, Sullissivik aamma KANUKOKA suleqatigalugit maanna nuna tamakkerlugu aaqqiissutissaq Allakkat Digitalimik misilerarlugulu atuutilersinnissaanik suliaqaleruttorput.


Allakkat tigussaasut digitalinngortinneqarnerat
”Innuttaasut IT-lu” pillugit Digitalimik Sullissinermut Aqutsisoqarfik ukiut tamaasa misissuisarpoq, ukiuni tallimani ataannartumik ineriartorneq 2014-imi ingerlaqqippoq; Pisortanik digitalikkut attaveqarsinnaaneq innuttaasunit annertunerujartuinnartumik piumaneqarpoq, kissaatigineqarluni pisariitsumik aamma digitalimik imminut sullissinnaanerit amerlanerusut.


Sullissineq pitsaanerusoq, isumannaatsoq aamma aningaasartuutaannginnerusoq

Allakkat Digitalimik atorlugu innuttaasoq pisortanik suliffeqarfinnillu illugiilluni attaveqaqatigiisinnaanermik ammaanneqassaaq. Innuttaasup allakkat tigussaasut, kinguaattoortoqartillugu puffannarsinnaallutillu ilungersuummernermik nassataqarsinnaasut, takkunnissaat utaqqisariaarutissavaa. 

Aaqqiissut tamanna NemID-mik atuinikkut pissaaq, taamaalillutik allakkat digitaliusut e-mailinut sanilliullugit paasiuminaallisagaassallutik. Ilutigitilluguttaaq digitalimik aaqqiissut taanna arlalitsigut pitsaaquteqarpoq, allaffissornikkut pisariillisaanermik, aningaasartuutikillisaanermik aamma suliat suliarineqartarnerisa sivikinnerulernerannik kinguneqassalluni.

Qupperneq ataavartumik Aqutsisoqarfimmit nutarterneqartassaaq, taamaalilluni suliniut, 2016-ip ingerlanerani naammassineqartussatut naatsorsuutigineqartoq, malinnaaffigineqarsinnaaqqullugu.