IKT-mut periusissiaq 2011-2015

2011-miit 2015-imut Kalaallit Nunaanni IKT-mut periusissiami attaviit pitsaasuupput

Paasissutissiisarnermut attaveqaqatigiinermullu periusissiami (IKT) anguniarneqartut nunap ataqatigiissinneqalernissaanut ilapittuutaapput, aammalu inuiaqatigiinnik nunanik tamalaanik ilisimaarinnittunik ineriartortitsinermut tunngaviliisuullutik, ineriartornermik atugarissaarnermillu pilersitsiviusumik.  

Periusissiaq Naalakkersuisunit akuersissutigineqarpoq, ukiunilu 2012-imiit 2015-imut atuuttuulluni. Inuiaqatigiinni ineriartornerup aqunneqartumik ataqatigiissumillu ingerlanissaata tapersersornissaa IKT-mut periusissiami pingaarnertut siunertarineqarpoq, taamaaliornikkut siunissami IKT-mut  aningaasalersuinerit pitsaanerpaamik sunniuteqarsinnaaqqullugit.

Paasissutissiisarnermut attaveqaqatigiinnermullu teknologi – IKT – ineriartortitsinerup atugarissaarnerullu angunissaannut aqqutissaavoq pingaarutilimmik inissisimasoq. Toqqammavik, Kalaallit Nunaata iluani ataqatigiilersitsisoq aamma avatitsinnut ataqatigiilersitsisoq pioreerpoq
– anguniagaq angutserlugu periarfissap atorluarnissaa maanna tullinnguuppoq.

Pisortat sullissivii pisariitsumik, tamakkiisumik isiginnittumik aamma ataqatigiissumik sullissinerat, kiisalu ingerlatsiviit akunnerminni suleqatigiinnerat innuttaasunit misigineqassaaq. Ilaatigut innuttaasunik sullissinerit pitsanngorsarneqassapput, kiisalu pisortat allaffissornikkut sullissinerat, ilaatigut digitalinngortitsineq aqqutigalugu, pisariillisarneqassalluni.  

Taamaattumik Suliniummik ingerlatsivik Namminersorlutik Oqartussani, kommuneni KANUKOKA-milu sulisunik inuttaqarpoq. Suliniummik aqutsisut Digitalimik Sullissinermut Aqutsisoqarfimmit aallaaveqarput.