Pisortanut akiitsut annikinnerusut - ilanngaassivik

Pisortanut akiitsunik akilersuineq siuarsarniarlugu inatsisitigut teknikikkullu periarfissanik misissuineq naammassineqassaaq aamma nutaanik akiitsoqalernissaq pitsaaliorneqarluni. Akiitsunik akiliisitsiniarnermi digitalimik sullissinerup annertusineqarnissaanut periarfissanik misissuineq naammassineqassaaq.

Suliassap nassuiarnerata siunertaa:

Ukiuni kingullerni pisortanut akiitsut qaffakkiartuinnarsimapput, kommuninut aamma Namminersorlutik Oqartussanut. Pissutsit attanneqarsinnaanngillat. Nutaanik akiitsoqalernissap pitsaaliorneqarnissaa peqatigitillugulu akiligassanik akilinngitsuukkanik nutaanngilisimasunik pitsaasumik akiliisitsiniartarnissaq pingaaruteqartuupput. Nunatta Karsianut inuttaasut akiligassaat akilinngitsuukkat maannamut takuneqanngitsumik sukassusilimmik amerliartorput. Ukiup ataatsip ingerlanerani pisortanut akiitsut 50 millioner kr.-inik amerleriarsimapput aamma maanna 900 millioner kr.-iullutik (2013-imi).  Aningaasat tassaapput akiligassat assigiinngitsut akilinngitsuukkat tamarmik, kisianni immikkut meeqqanut akilersuutit, illumut/ineqarnermut akiligassat aamma akileraarutinut akiliutit ikinaarutit naatsorsuutinut ilaapput.

Akiitsunik akiliisitsiniarnermik suliaqarneq suli kisitsisinik tunngaveqarnerusumik ingerlanneqassaaq (digitaliseres), aaqqissuussaanerlu navialissutaasinnaasut pillugit paasinarnerulersillugu aaqqissuunneqassalluni aamma innuttaasunik ataasiakkaanik imaluunniit ilaqutariinnik akiitsoqalernikkut ajornartorsiulersimasunik ikorfartuinerussalluni.

Tamatumunnga ilanngullugu pisortat tungaannit aalajangiunneqarpoq suliniutinik arlalinnik aallartitsinissaq matumani kontomik qitiusumik, Ilanngaassivik-mik, pilersitsisoqarsinnaanersoq misissoqqissaarneqassalluni, tassunga innuttaasut isertitaat/aningaasarsiaat ikineqartassallutik, tassanngaanniillu pisortanit akileeqqusissutit isumannaarneqartassallutik (soorlu imermut, kiassarnermut, inimut akiliutit, akileraarutinut, sillimmatinut, meeqqanut akliutit, ulluunerani paaqqinnittarfimmut akiliutit, eqqagassanut akiliutit, atuarfimmi namminersortumi atuartuuteqarnermut akiliutit il.il.). Tamatuma kingorna isertitat sinneri innuttaasup nammineq aningaaserivimmi kontoanut ikineqassapput.

Suliassamik piginnittoq: Akileraartarnermut Aqutsisoqarfik

Aqqutsisoqatigiit siulittaasuat: Kim Neumann, (akileraartarnermut aqutsisoqarfik), KNN@nanoq.gl

Aqutsisoqatigiit: Siunnersuut: Ole Peter (KANUKOKA), kommunit,  Ineqarnermut Naalakkersuisoqarfik, Hans Erik Brisson (Nunamut Namminermut tunngasuni), Dorte Bøge Sørensen (Digitalimik Sullissinermut Aqutsisoqarfik)

Suliamik aqutsisoq: Siunnersuut: Jan Bredgaard

Suliap aallartinnera naammassineralu: 01.01.2013 - ?

Killiffik: Isumassarsiap killiffia

Killiffik: Ulloq:: 09.06.2014

Allaatiginninneq: Inatsisiliornermut tunngasunik aamma teknikikkut periarfissanik misissueqqissaartoqassaaq pisortanut akiligassanik akiliisarneq siuarsarniarlugu aamma nutaanik akiligassaqalernissaq pinaveersimatinniarlugu.
Akiligassanik akiliisitsiniartarnermut atatillugu digitalimik sullissinerup annertunerulernissaanut periarfissanik misissueqqissaartoqassaaq.
Tullianik ataatsimiinnissaq pissaaq 11. juni, tassani suliap aaqqissuussaanera aamma imarisaa oqallisigineqassaaq

Paasissutissat takukkit: Suliap nassuiarneqarnera(Projektkommissorium,), Business Case, Inaarutaasumik nalunaarusiaq