Kalaallit Nunaannut digitalinngortitsinermut periusissiaasimasoq inuiaqatigiit digitaliunerusutut ataqatigiinnerusut, isumannaannerusut nutaaliornerusullu anguniarlugit toqqammaveqarneruvoq.
Innuttaasut tamarmik inuiaqatigiinni digitaliusuni peqataalluarniassammata, innuttaasut pisortat digitalimik kiffartuussissutaannut isersinnaanerat, cyberimi isumannaatsuunerup nukittuujutinnissaa digitalimilu pissuserissaarnerup siuarsarneqarnissaa pitsanngorsarniarneri periusissiami pingaarnerpaatinneqarput.
Aamma Kalaallit Nunaata nunani tamalaani suleqateqarnerata nukittorsaavigineqarnissaa, teknologiip nutaap atorluarneqarnissaa kiisalu nutaaliornerup aallarnisaanerullu siuarsaavigineqarnissaat anguniarneqarput. Tamatuma saniatigut peqqinnissaqarfiup immikkoortuata digitalinngortinniarneqarnera aamma kikkunnut tamanut isersinnaaneq periarfissallu qulakkeerniarlugit kiffartuussissutit pitsaanerpaanngortinniarlugit suliniartoqarnikuuvoq.
Digitalinngortitsinermi periusissiaq 2018-2021 aasinnaavat uani.
Digitalinngortitsinermut periusissiaq 2014-2017 naapertorlugu, Kalaallit Nunaat tamakkerlugu digitalinngorsaanerup siuarsaavigineqarnissaa pingaarnerpaatinneqarpoq.
Periusissiami internettimik atuisinnaaneq pitsaanerusoq akikinnerusorlu, pisortani kiffartuussissutit pisariinnerusut, ilinniartitaanerup digitaliunissaanut siuarsaaneq, kiisalu peqqinnissaqarfiup immikkoortuani tele atorlugu nakorsiartarnerup atorneqarnerulernissaa anguniarneqarput.
Anguniagaq qitiulluinnartoq tassaavoq innuttaasut nunami sumiikkaluarunilluunniit digitalikkut aaqqiissutinut, naligiinnerusumik isersinnaanissaat anguniassallugu. Periusissiami aamma digitalikkut attaveqaasersuutit pitsanngorsakkat aqqutigalugit nutaaliorneq aallarnisaanerlu tapersersorneqarput.
Digitalinngortitsinermi periusissiaq 2014-2017 aasinnaavat uani.
Kalaallit Nunaanni paasissutissani attaveqaqatigiinnermilu teknologiimut (ITK) periusissiami 2011-2015-meersumi paasissutissani attaveqaqatigiinnermilu teknologiip periarfissai atorluarlugit inuiaqatigiinni ineriartortitsineq anguniarneqarpoq.
Periusissiami nunami inuiaqatigiit digitalikkut ataqatigiinnerulernissaat aamma ineriartorneq atugarissaarnerlu qulakkeerniarlugit, nunarsuup sinneranut attaveqarnerup pitsanngorsarnissaa ukkatarineqarput.
IKT pisortani immikkoortoq pisariinnerusoq ataqatigiinnerusorlu pilersissallugu sakkussatut qitiusutut isigineqarpoq, ilaatigut innuttaasunik sullissineq digitalinngortitsinerlu allaffissornermut pisariillisaataassallutik.
Periusissiaq pisortanit namminersortunillu siunnersuuteqartoqarneratigut suliarineqarpoq.
Attavissaq
Digitalinngortitsinermut periusissiat atuussimasut pillugit apeqqutissaqaruit, attaveqarsinnaavutit uunga digitalisering@nanoq.gl.