Atorfilittat

Inatsisilerinermi atorfilittat Digitalinngortitsinermut Aqutsisoqarfiup sulisorisaanut ilaapput. Suliassat akisussaaffigisaat ilaatigut makkuupput:

Iluarsaassineq aamma inatsisit
Inatsisilerinermi atorfilittat digitalimut tunngassuteqartut iluarsisassat suliarineqarneri, atuutilersinneqarneri aamma nassuiarneqarneri akisussaaffigaat. Tamatuma malitsigisaanik inatsisissatut siunnersuutit, nalunaarutit allallu iluarsiinermi allatassat suliassanut ilaapput. Malittarisassat inatsisillu nutaat erseqqissuunissaat pitsaasuunissaallu aamma pingaarnertut qinikkat anguniagaannut naapertuuttuunissaat qulakkeerniarlugit, pisortani oqartussaaffeqarfiit soqutigisaqaqatigiillu allat qanimut suleqatigisarpaat. Inatsisilerinermi atorfilittat inatsisit digitalinngorsarneqarneri pillugit siunnersuisarput.

Isumaqatigiissusiorneq isumaqatigiissutinillu aqutsineq 
Inatsisilerinermi atorfilittat Digitalinngortitsinermut Aqutsisoqarfimmi qarasaasiaqarnermi neqeroortitsinerit pisiniartarnerillu annertuut isumagisarpaat. Qarasaasaqarnermi neqeroortitsinerit pisiniartarnerillu suliarineqartarneri immikkoortortaqarfiit oqartussaaffeqarfiillu allat pisiassanik atuisussat qanimut suleqatigalugit pisarput. Aammattaaq isumaqatigiissutaareersunut atatillugu allannguutit isumaqatigiinngissutaasullu pillugit ikiuuttarput.

Qarasaasiatigut atortorissaarutit akuerineqartarneri
Qitiusumik allaffeqarfimmi suliffiup iluani digitalimik aaqqissuussaanermi Digitalinngortitsinermut Aqutsisoqarfimmit atortinneqartumi, qarasaasiaqarnikkut atortorissaarutit suulluunniit atorneqartussat, inatsisilerinermi atorfilittanit akuerineqaqqaartussaapput. Qarasaasiaqarnikkut atortorissaarut imaluunniit applikationeq, qitiusumik allaffeqarfimmi qarasaasiaqarnikkut atortorissaarutinut allanut sillimaniarnikkut nalorninartoqarnersoq naliliivgineqassaaq.

Neqeroortitsinerit tamaasa tamanut avammut saqqummiunneqannginneriniit, qitiusumik allaffeqarfiup qarasaasiaqarnikkut neqeroortitsissutai tamarmik inatsisilerinermi atorfilittanit akuerineqaqqaartussaapput, cyberimi paasissutissanilu isumannaallisaanerup tungaatigut aalajangersagai naammaginarnersut eqqarsaatigalugit.

Qitiusumik allaffeqarfimmi oqartussaaffeqarfiit sullissinerminni atorusutaat applikationit allat pisiassat aamma akuerineqaqqaartassapput.

Inunnut paasissutissanik illersuineq
Inatsisilerinermi atorfilittat inunnut paasissutissanik illersuinermut inatsisip qanoq paasineqarnissaanut qanorlu atorneqarnisaanuttunngatillugu siunnersuisarput. Inunnut paasissutissanik illersuinermut malittarisassat qanoq atorneqarnissaat pillugit oqartussaaffeqarfiit ikiorneqartarput. Tamatumunnga ilanngullugu paasissutissatigut unioqqutitsisoqartillugu qanoq periuseqartarnissaq, paasissutissatigullu unioqqutitsisoqarsimanerata kingornagut qanoq suliassiissutit suliarineqartarneri .

Suleqatigiinneq aamma attaveqaqatigiinneq
Inatsisilerinermi atorfilittat qanimut suleqatigisarpaat qitiusumik allaffeqarfimmi immikkoortortaqarfiit allat, suliffiup avataani suleqatit, aamma soqutigisaqaqatigiit. Suliniutit immikkoortuini tamani inatsisilerinermut tunngasut ilaatinneqartarneri qulakkeerniarlugit ataatsimiinnerni, workshoppertitsinerni oqalliffiusartunilu allani peqataasarput. Inatsisilerinermilu sammisat paasiuminaassinnaasut sulisunut inatsisilerisuunngitsunut paasiuminarsartarpaat.

Ilinniartitaaneq aamma piginnaasanik ineriartortitsineq 
Qarasaasiaqarnermut suliassaqarfiup iluani paasissutissanik illersuineq, qarasaasiaqarnikkut isumaqatigiissutit neqeroortitsinermilu sammisat pillugit paasisat  tungaasigut qitiusumik allaffeqarfimmi piginnaasat annertusaaffiginiarlugit, ilinniartitaanermut piginnaasanillu ineriartortitsinermut  tunngasunik inatsisilerinermi atorfilittat ataavartumik aaqqissuussisarput. Matumani pikkorissaanerit, isumasioqatigiisitsinerit aamma workshoppertitsinerit ilaasinnaapput.

Paasissutissanik illersuinermut qarasaasiaqarnikkullu isumaqatigiissutinut  paasinninnerulerneq innuttaasut pisinnaatitaaffiinik illersuinermut pingaaruteqarluinnarpoq. Pisortani oqartussaaffeqarfinnit inunnut paasissutissaataannik illersorneqarneri, inuit pisortaqarfinnut tatiginnilersitsivoq, matumani nittartakkatigut saassussinermut imaluunniit paasissutissanik unioqqutitsisoqarneranut annikitsumut atatillugu tunngassuteqaraluarpalluunniit.