Cyberimi Paasissutissanilu isumannaallisaanermut immikkoortortaqarfik pilersinneqarpoq cyberikkut saassussisoqarsinnaanerata annertusiartornera eqqarsaatigalugu isumannaallisaanerup nukittorsarneqarnissaa siunertaralugu, matumani 2022-mi qitiusumik allaffeqarfiup saassunneqarnera eqqarsaatigaluguttaaq.
Kalaallit Nunaanni innuttaasut, suliffeqarfiit oqartussaaffeqarfiillu akornanni cyberimi paasissutissanilu isumannaallisaanerup qaffanneqarnissaa immikkoortortaqarfimmi sulissutigineqarpoq. Nuna tamakkerlugu digitalinngortitsinermik periusissiornermi pingaarutilittut inissisimapput, nunallu akornanni isumannaallisaanerup pitsaassusaanut naapertuuttumik Kalaallit Nunaanni digitalikkut ineriartorneq ukkataralugu.
Kalaallit Nunaata EU-p avataani nunat pingajuattut isumannaatsutut anguniagaqarneranut immikkoortortaqarfiup sulinera toqqammaviliisuuvoq.
Cyberimi paasissutissanilu isumannaallisaanermut immikkoortortaqarfiup akisussaaffigai:
- Suliniutit oqartussaaffeqarfinnut tunngatitaasut
- Paasissutissanik illersuinissamut periusissiamik atuutsitsilernissamut kommuninut ikiuunneq.
- Paasissutissanik illersuinissamut periusissiamik atuutsitsilernissamut siunnersuineq.
- Upalungaarsimaneq pillugu pilersaarutinut sungiusaatissanillu suliaqarnissamut siunnersuineq.
- Periusissiap matuma ingerlannerani qitiusumik allattoqarfimmi ISO 27001-imik atuutsitsilerneq.
- Pisortaqarfinni aqutsisunut paasissutissaatissanik nittartakkatigullu sillimaniarneq pillugu ilinniartitsinissamut pilersaarusiorneq.
- Suliniutit innuttaasunut suliffeqarfinnullu tunngatitaasut
- Nittartakkamik pilersitsineq, taanna aqqutigalugu innuttaasut suliffeqarfiillu ulluinnarni qularnaatsumik nittartakkatigut periuseqarsinnaanermut siunnersuutinik ilitsersuutinillu atuarsinnaassapput.
- Pisortaqarfinnut, namminersortunut innuttaasunullu paasititsiniaaneq.
Paasissutissat annertunerusut
Cyberimi Paasissutissanilu isumannaallisaanermut immikkoortortaqarfiup qitiusumik allaffeqarfiup immikkoortui tamaasa qanimut suleqatigai. Qarasaasiaqarnikkut paasissutissiisarnikkullu isumannaallisaanermut kaajallaasitaq naapertorlugu oqartussaaffeqarfiit immikkut tamarmik ikinnerpaamik ataatsimik paasissutissani isumannaallisaanermut akisussaasumik toqqaassapput, sumiiffinni allani paasissutissanik isumannaallisaanermik suliaqartunut ikiuuttussamik, kiisalu namminerisamik oqartussaaffeqarfigisaminni paasissutissanik isumannaallisaanermut suleqataasussamik.