Pisortaqarfinni Aaqqissuussaasumik Digitalikkut Ataqatigiissitsineq (FODA)

Kalaallit Nunaanni pisortaqarfinni suleriaatsimik pitsaanerulersitsisussamik sunniuteqarluarsitsisussamillu digitalinngoriartuaartoqarpoq. Eqqortumik iliorutta annertoorujussuarmik periarfissaqarpoq. Kalaallit Nunaanni digitalinngoriartuaarnitsinni pisortaqarfinni digitalimik ataqatigiimmik suleqatigiinnissap anguneqarnissaannut, kommunit oqartussaaffeqarfiillu aaqqissuussineq ataaseq malillugu suleqatigiinnissaat pisariaqartipparput.

Innuttaasut ukiumoortumik nalunaarusianik immersuitillugit, pisaminnik nalunaaruteqartillugit allatigulluunniit kommuninut oqartussaaffeqarfinnullu attaveqartartillugit, atortut periutsillu assigiinngitsut atorneqartarput. Taamaattuarallassaarlu. Digitalimik aaqqissuussussineq ataatsimoortoq atorneqanngippat atortut periutsillu imminnut atassuserneqarsinnaanngitsut atorneqaannassappata, suleriuseq akisooq ingerlanneqarsinnaavoq. FODA aqqutigalugu kommunini oqartussaqarfinnilu allani digitalimik aaqqiissutit pitsaasuussasut ataqatigiissinnaanerallu qulakkeerneqassaaq, taamaalilluta pisortaqarfinni digitalimik immikkoortoqarnitsinni iluaqutit atorluassavagut.

Tamanna angusinnaagutsigu innuttaasut suliffeqarfiillu sunniuteqarluartumik, ataqatigiittumik ammasumillu kiffartuunneqassapput – aamma pisortaqarfinni sulisut digitalimik ataatsimoorussami pitsaanerujussuarmik innuttaasunut kiffartuussinissaat periarfissaalluarnerujussuussaaq. 

FODA makkununnga iluaqutaassaaq:

• Digitalimik suleriutsinik pisariillisaaneq
• Paasissutissanik pitsaanerusumik avitseqatigiinneq akimorlugulu suleqatigiinneq
• Digitalimik aaqqiissuteqarnikkut aningaasartuutikinnerulerneq sulisunillu atuinikinnerulerneq
• Pisortaqarfinni digitalimik aaqqiissuteqarnerit akimorlugit assigiissaarinerulerneq ataqatigiinnerulernerlu

Oqartussaaffeqarfiit akornatsinni ataatsimut suleqatigiinnitsigut, pisortani digitalinngortitsinikkut aatsaat iluanaaruteqarsinnaavugut. 

FODA pisortaqarfinni aaqqissuussaasumik digitalikkut ataqatigiissitsineruvoq, taamaattumillu Digitalinngortitsinermut Aqutsisoqarfiup, kommunit, namminersorlutik oqartussat qitiusumik allaffeqarfiisa taakkulu suliffeqarfiisa akornanni ataatsimoorussamik FODA pilersinneqartarpoq. 

Digitalinngortitsinermut Aqutsisoqarfik suliniutinut aqutsineq akisussaaffigaa, kisianni aqutsisut, qarasaasiaqarnermut akisussaasut oqartussaaffeqarfinnilu ataasiakkaani sulisut suleqatigiinnerisigut FODA-p suliarineqarnera piviusunngortinneqarsinnaavoq.

FODA-p ineriartortinneqarnera ataqatigiittumik aaqqissuussinermi suleqatigiinnit pisortaqarfinni ataatsimut sulisuniit isumagineqassaaq. Suliniutip ingerlanneqarnerani suleqatigiit naapikulasassapput FODA-llu naammassineqarnissaa taassuminnga atuilersussat qanimut suleqatigineratigut qulakkiissallugu. Tamatuma saniatigut ukiumoortumik FODA workshoppimut kiisalu ataavartumik nittartakkatigut ataatsimiittarnissanut pisortaqarfinni ataatsimoorussaniit soqutigisaqaqatigiit arlallit aggersarneqartassapput.

2025-mi upernaakkut aaqqissuussaasumik ataqatigiissitsinernut malittarisassat siulliit, taakkununngalu attuumassuteqartut sakkussat saqqummiunneqassapput. Tamatuma kinguninngua atoriaannanngussapput.

Aaqqissuussaasumik ataqatigiissitsisoqatigiit FODA-p suliarineqarnera nangissavaat – aaqqissuussaasumik ataqatigiissitsinermut malittarisassat sakkussallu pioreersut pitsanngorsarlugillu malittarisassat sakkussallu pisariaqartut allat pisortani aaqqissuussaasumik digitalikkut ataqatigiissakkamik qulakkeerinneqataasussat suliarineqassapput.