Digitalimik Sullissinermut Aqutsisoqarfik

- Kalaallit Nunaata digitalinngorsarneqarneranut siuuttoq

Digitalimik Sullissinermut Aqutsisoqarfik 2013-imi pilersinneqarpoq, ullullu tamaasa Kalaallit Nunaata pisortatigoortumik digitalinngorsarneqarnera suliaralugu, taamaaliornikkullu pisortat ingerlatsiviini annertuusaanissamik, naammassisaqarsinnaassutsimik qaffassaanissamik aamma pisariillisaanissamik Naalakkersuisut anguniagaannik tapertaalluni. Aqutsisoqarfiuttaaq Namminersorlutik Oqartussani IT-eqarnikkut isumannaatsumik aamma nutaaliaasumik suliaqarnissaq akisussaaffigaa, aammalu suliarinnittussanik avataaneersunik isumaqatigiissusiorneq aqqutigalugu Kalaallit Nunaanni IT-eqarnikkut nutaamik periutsimik eqqussinermut peqataalluni.

IT-eqarnikkut digitalimillu aaqqiissutit Kalaallit Nunaata atorlualeriartorpai. Misissuinermi ”Kalaallit Nunaanni Innuttaasut aamma IT ” 2014-imeersumi takutinneqarpoq ukiuni kingullerni tallimani ineriartorneq ingerlaannartoq:

  • Innuttaasut 77 %-ii angerlarsimaffimminni internettersinnaapput. Ukiup ataatsip ingerlanerani amerleriaat 28 %-iulluni.
  • Innuttaasut 63 %-iisa pisortat ingerlatsiviisa digitalimik attaveqaqatigisinnaanerat piumanerujartorpaat. Ukiup ataatsip ingerlanerani amerleriaat 13 %-iulluni.
  • Innuttaasut 21 %-inik amerlanerusut ukiup ataatsip ingerlanerani digitalimik imminnut sullinnissamik periarfissaq atulersimavaat.

Tamaalilluni pisortani sullissiviit siumut ingerlapput. Namminersorlutik Oqartussat aamma kommunet qaffasissumik ingerlatsipput, pisortanilu sullissiviit nutaamik ingerlatsilernissaannut allanngortikkiartuaarlugit, taamaalilluni pisortani kiffartuussiviit siunissami digitalimik annertunerusumik ingerlatsiviulersussanngorlugit.  


Pisariillisaaneq aamma pisortani ataqatigiissumik sullissineq
Digitalinngortitsineq pitsaasumik inissisimavoq, misiligarneqarluarsimalluni allaffissornikkut pisariillisaanissami nutarsaanissamilu, aamma naammassisaqarsinnaassutsimik qaffassaanissami kiisalu pisortat kiffartuussinerisa ataqatigiinnerusumik innuttaasunit suliffeqarfinnillu misigineqarnissaanik aqqutissiueqataalluni.  

Kalaallilli Nunaanni pisortani digitalinngortitsinermik allanngortitsiniarneq nutaamik eqqarsarnissamik, oqaloqatigiinnissamik aamma sapiissusermik pisariaqartitsiviuvoq.  Allannguinerup annertuup tamatuma iluatsinnissaa Digitalimik Sullissinermut Aqutsisoqarfimmit siuuttuuffigineqarpoq, taamaattumillu sulinerput pisortat sullissiveqarfiini nutarsaanermi pingaarutilimmik inissisimavoq.


Pisortani ataatsimoorussamik suleqatigiinneq aamma nutaanik misileraanissamut sapiissuseqarneq
Kalaallit Nunaanni pisortatigoortumik annertunerusumik digitalinngortitsinissaq anguniarlugu aqutseriaatsinut nutaanut ammanerusumik periuseqartoqartariaqarpoq, suleqatiginneriaatsit nutaat sapiissuseqarfigineqarnerusariaqarput, allaffissornerup annikinnerulersikkiartuaarnissaanut sapiissuseqartariaqarpoq, aamma annertunerusumik digitalinngortitsinermut inatsisitigut piareersimasariaqarpoq kiisalu allannguineq pillugu politikkikkut oqallinnissamik piumassuseqartoqartariaqarluni. 

Kommunet ataasiakkaat aamma oqartussat allaffissornikkut ingerlatseriaatsiminnik tamakkiisumik allanngortitsisariaqarput, inuiaqatigiinnilu allannguineq annertooq tamanna pillugu siammarterisoqartariaqarpoq, taamaaliornikkut innuttaasunit suliffeqarfinniillu piviusoq nutaaq ilisimaneqaleqqullugu toqqissisimaffineqaqqullugulu.

Digitalikkut allannguineq tamanna taamaattumik immikkuullarissumik pisortat ataatsimoorlutik suleqatigiissutissaattut inissisimavoq, Digitalimik Sullissinermut Aqutsisoqarfimmit arlalippassuartigut kiffartuussiffiusoq, peqataasulli tamarmik akisussaaffimmik annertuumik akisussaaffeqarput Kalaallit Nunaanni pisortat ingerlatsiviini digitalinngortitsinerup annertunerusup anguneqarnissaanut ataatsimoorluta angusaqarnissatsinnut.