Inunnik paasissutissanik suliarinnittarneq pillugu inatsit pillugu paasissutissiilluni ataatsimiititsinerit peqataaffigilluarneqarput

Inunnik paasissutissanik suliarinnittarneq pillugu inatsit pillugu paasissutissiilluni ataatsimiititsinermut, pingasunn gornermi ulloq 1. februaari HHEmi pisumut, kommuneni aamma Namminersorlutik Oqartussani atorfillit 130-it takkupput. 

Inunnik paasissutissanik suliarinnittarneq pillugu inatsit paasissutissat inunnut tunngasut illersorneqarnissaannut, aamma paasissutissat inunnut tunngasut qaqugukkut aamma qanoq pisortat aamma namminersortut suliffeqarfiini suliarineqarnissaannut, minnerunngitsumillu paasissutissat qanoq isumannaallisarneqarnissaannut tunngavoq. Inatsit Kalaallit Nunaanni  atuutilersinneqarpoq ulloq 1. decembari 2016.

Digitalinngortiterinerup annertunerulernera peqatigalugu paasissutissat inunnut tunngasut pissarsiariuminarnerulerneranni inatsisit, paasissutissat inunnut tunngasut illersorneqarnissaannut tunngasoq, pisariaqarnerulersippaa. Taamaattumik paasissutissiilluni ataatsimiititsinerit paasissutissat illersorneqarnissaasa 2017-imi nunat tamalaat akornanni ulloqartinneqarneranut atatillugu inissinneqarput.

Suliffeqarfiit namminersortut aamma ilinniartoqarfiit paasissutissat inunnut tunngasut qanoq suliarissanerlugit sisamanngornermi ulloq 2. februaari paasisaqarfiginissaannut tullinnguupput. Tassunga soqutiginninneq aamma annertuvoq, 85-it peqataaniarlutik nalunaarsimallutik.

Tamatuma saniatigut paasissutissiilluni ataatsimiititsineq oqaatsit marluk atorlugit videostreamerlugu ingerlanneqarpoq. Taamaalillutik Kommune Kujallermi, Qeqqata Kommuniani aamma Qaasuitsup Kommuniani sulisut paasissutissiilluni ataatsimiititsinermut linki aqqutigalugu malinnaanissaminnut periarfissinneqarlutik.

Saqqummiussinerit Digitalimik Sullissinermut Aqutsisoqarfiup nittartagaani www.Digitalimik.gl -mi pissarsiarineqarsinnaassapput. Paasissutissiilluni ataatsimiititsinermit immiussamik aamma ulluni qaninnerni ikkussisoqassaaq. Inatsit tamakkiisoq, aamma ilitsersuutit kalaallisut danskisullu Datatilsynip nittartagaani pissarsiarineqarsinnaapput. 

Inunnut paasissutissanik suliarinnittarneq pillugu inatsit saqqummiunneqarneranni takutitassiat uani takukkit