Qarasaasiakkut SMS’ikkullu digitalimik allagarsisinnaalerput

Innuttaasut maanna qarasaasiakkut SMS’ikkullu digitalimik allagarsisinnaalerput

Digitalikkut allagarsisarfimmik, NemPostimik, Digitalimik Sullissinermut Aqutsisoqarfik maanna atuutilersitsivoq, allakkanik digitaliusumik tigusisalerumallutik innuttaasut piumasut Sullissivik.gl aqqutigalugu ilannguffigisinnnaasaannik. NemPostimik aaqqiissut nuna tamakkerlugu digitalinngortitsinermut periusissiatsinnut ilaavoq.

Pisortat aamma suliffeqarfiit tamarmik innuttaasunut maanna allakkanik digitaliusunik NemPosti atorlugu nassitsisinnaalerput. Allakkat Sullissivik.gl-i aqqutigalugu, imaluunniit Adroid’imut aamma iPhonemut app’i atorlugu ammarneqarsinnaapput. Digitaliusumik allagarsisarfimmi nutaanik allagarsiassaqartoqaraangat e-mailimik tigusisoqartassaaq. Allakkat atuarnissaat pingaaruteqartutut nassitsisumit nalilerneqarpat, sms’imik oqarasuaatinnut nassinneqassaatit. Tassa akissarsiavit allagartaat, kommunemit allakkat aamma allakkat pingaarutillit allat digitaliusumik allagarsisarfikkut tigusinnaalissavatit – ulloq unnuarlu naallugu ilinnut ammasussaq.

Halibut Greenland’i peqatigalugu misiliineq iluatsilluartoq
Aaqqiissut qaammatini kingullerni qulini Halibut Greenland’i suleqatigalugu misilittarneqarpoq. Aalisartut tunisaasa annertussusaannik ingerlaavartumik SMS’ikkut ilisimatitsisarnermut atorneqarpoq, kiisalu pisassiissutit taakkulu assigisaasa pingaarutillit ilisimatitsissutiginerannut atorneqarluni.

Aaqqiissut Halibut Greenland’imut iluatsitsilluarfiuvoq, misileraanermi piffissaq tamakkerlugu ilisimatitsissutinik 16.000-init amerlanerusunik nassitsisoqarsimalluni. Aammattaaq qullersaqarfimmut saaffiginnittarnerit ikilinerat malugineqarpoq, ilutigitillugulu tunisassiorfimmi sulisunik toqqaannartumik attaveqaqateqarsinnaaneq pisinnaasimalluni. Kingullertut taaneqartumut tunngatillugu sulisut suliffissaasa nakkutiliisuuffissaasalu ataqatigiissarneqarnerannut tunngatillugu Halibut Greenland’imut pisariillisaataanera annertunerulersimavoq.

”Halibut Greenland’imik assersuutip takutippaa NemPostimik atuineq tamanit pissarsissutaasoq. Aaqqiissutaavoq tamanut pisariitsuullunilu atuisussanut piuminarsagaasoq, NemPostillu atorneqarnerata inuiaqatigiinni tamanut siammarnissaa qilanaaraara”, Randi Vestergaard Evaldseni, Aningaasaqarnermut Aatsitassanullu Naalakkersuisoq, iluarisimaarinnilluni oqarpoq, aammattaaq aaqqiissut pisortat ingerlatsiviinut suliffeqarfinnillu aningaasatigut ileqqaarutaanissaanik nuannaarutiginnittoq, tamatuma suliassat ingerlanneqartarnerat pisariinnerulersissammagu.

Ilanngunngunniarlutit massakkut nalunaarit, piareersimallutillu
NemPostimik aaqqiissummut ilanngunnissannik soqutiginnikkuit maannangaaq taamaaliorsinnaalereerputit. Taamaaliornikkut skattekortinik, akissarsiat allagartaannik aamma allakkanik allanik ilinnut pingaarutilinnik nassiussuisoqarneranut piareersimassaatit. Aammattaaq allakkat ingerlaannartumik tigusalernissaat qilanaarisinnaavat, Nuussuarmi, Ittoqqortoormiini, Tasiusami allarluinnarmiluunniit najugaqaraluaruit.

Annertunerusumik paasissutissanik paasisaqarusunnermi attavigineqarsinnaavoq Martin Chrisitansen, oqa: +299 34 56 51, mail mchr@nanoq.gl